Asian Cup qualifier-a India hmachhawn tur chiang

AFC Asian Cup China 2023 final round qualifier-a an group match khelh tur bik chu India chuan June thla hian a thleng dawn a, Ningania draw neihah Blue Tigers hi Hong Kong, Afghanistan leh Cambodia te nen group D-ah an awm ho dawn.

India chuan group D inelna hi Salt Lake Stadium, Kolkata-ah a thleng dawn a, June 8-ah Cambodia hmachhawn hmasa berin Afghanistan (June 11) leh Hong Kong (June 14) nen an inkhel leh ang.

AFC Asian Cup China 2023 final round qualifier-ah hian team 24 an inel dawn a, group parukah, team pali zel awmin ṭhen hran an ni a, group hmahruaitu ṭheuh bakah pahnihna ti ṭha zual panga chu Asian Cup 2023 khel turin an tling dawn a ni.

Blue Tigers hian qualifier inbuatsaih nan March thla khian international friendly match an khel dawn a, Bahrain (March 23) leh Belarus (March 26) hmachhawnin, match pahnih hi Manama, Bahrain-ah khelh a ni ang.

India coach Igor Stimac chuan, "May kar hmasa ber aṭangin Kolkata khawpuiah kan inkulh nghal ang. Mahse, ATK Mohun Bagan player-te AFC Cup an khelh dawn avangin an awm ve thei dawn lo a, kan player neih ang dangte enna hunah kan hmang mai dawn a ni," tiin a sawi.

Stimac chuan, "Afghanistan hmachhawn a awlsam ngai lo a, international league-a tawnhriat nei player an kawl nual. Hong Kong hian Brazil-a khel player pathum, UK leh New Zealand-a khel player pakhat ve ve bakah, ram pawn player an nei nual a, rinkai ber kan nihna anga kan khelhchhuah a ngai dawn a ni," a ti.

Croatian boss chuan, "Mahni khelmuala inkhel tur kan ni a, fans puihna nen kan phur lehzual ngei ang," tiin an zam loh thu a sawi zui.