Odisha-in Sebastian hoin Bagan chelh
Mizo tlangval Sebastian Thangmuansang chu Ningani zan khan Indian Super League-ah hero of the match-a thlan a ni a, Odisha leh Mohun Bagan 1-1 a an inhnehtawkna inkhelah Odisha tan ban rinawm a ni.
Indian Super League-a beisei tur nei tawh lo Odisha FC hian semifinal khelh tum ATK Mohun Bagan chu 1-1 in an inhnehtawkpui a, Kolkata club tan Ningani zana an inkhel result hi a la pawi thui thei.
Odisha tan Redeem Tlang chuan minute ngana lekah goal hmahruai a khung a, Bagan-in Joni Kauko penalty hmangin an chhanglet zui - hun tawp thlengin goal dang a lut lo a, draw result-ah team pahnihin lungawi an zir a ṭul.
Boruak a sang
Odisha-in beisei tur nei tawh lo mah se chak an duh tih an pholang a, inkhel ṭan aṭanga minute ngana lekah Redeem Tlang chuan goal hmahruai a rawn khung a, Bagan an hawihai.
Mahse, Kolkata club hi an lungphang rei lo - goal an chhuah aṭanga minute thumna lekah Odisha left back Sahil Panwar chuan Bagan midfielder Hugo Boumous a ti tlu a, penalty a chawi.
Finland tana vawi 28 inlan tawh Joni Kauko chuan penalty hi goal-ah a chantir a, 1-1 a ni. Minute 10 a tlin hmain goal hnih kan hmu a, goal dang luh belh tura ngaih a nih laiin goal dang erawh a lut zui tawh lo!
Odisha an vanduai
Minute 22-naah Odisha-in penalty an hmu ve leh a, Bagan defender Tiri chu Aridai Suarez lakah a foul. Penalty pet turin ball pet thiam bik Javier Hernandez lo pen chhuak mah se goal-ah a chantir thei lo a, Amrinder Singh chuan ṭha zetin a dansak.
Penalty hlawh chhuaktu Suarez hian Amrinder chauh a hmachhawn hnuah Redeem tan a siamsak bawk a, mahse, Shillong tlangval hian a goal hnihna a khung theih loh avangin 1-1 a nih chhunzawm.
Odisha tan Malaysia international Liridon Krasniqi chuan woodwork a tih per bawk - Bagan striker chhuanvawr Roy Krishna chu hun pek belh minute thumnaah yellow card pahnihna pek niin hnawhchhuah a ni a, Odisha tan chhawrna hun erawh a awm tawh lo.
Mizo hming a mawi
Odisha tan Jerry Mawihming-thanga, Isaac Vanmalsawma leh Sebastian Thangmuansang ten inkhel bul an ṭan a, minute 40-naah Daniel Lalhlimpuia chu luhtir a ni bawk.
Right back-ah Sebastian a khel ṭha takzet a, Churachandpur tlangval hian ISL-a a vawi khat nan hero of the match chawimawina a dawng - Pune City, Chennai City, NEROCA leh Gokulam Kerala FC tan a lo khel tawh.
Sebastian hian 2020-21 season khan Gokulam tan I League nomawi a lo chawi tawh a, ISL-ah match li chiah la khel mah se a match li khelhnaah hero of the match a ni der.