Zaninah Mizo boxer ṭhate an inlan dawn

Mizo boxer ṭhate zanin hian Dubai-ah an inhnek dawn. Boxing hmanga India leh Pakistan inhmachhawn turah hian Mizo boxer ṭha pathum Lalrinsanga Tlau, Nutlai Lalbiakkima leh Laldingliana te an inlan dawn. Mizo tlangvalte inhnek hi Zonet kaltlangin a en theih ang.

Golf Club, Dubai-ah Tuipui tlangval Laldingliana chu Mizo boxer zingah a inlan hmasa ber dawn a, zanin dar 5:45-ah Muhammad Ammar Khan a hmachhawn dawn.

Siaha tlangval NT-a a inlan chhunzawm lehnghal dawn a, dar 6:00-ah Fida Muhammad nen an inhnek ang. Mizo zinga professional boxer hmasa ber Sangtea leh Muhammad Sikandar Abbasi te dar 7:00-ah an inhmachhawn dawn bawk.

Sangtea a inpeih
Khawruhlian tlangval Sangtea'n professional fight vawi ruk a hmachhawnah hnehna a chang vek a, WBC Youth title kawltu a ni bawk. Mizo tlangval hi Dubai-ah hian ṭum hnih a inhnek tawh a, tun hi ṭum hnihna tur a ni.

Sangtea chuan, "Dubai-ah hian fight ṭum hnih ka neih tawh bakah training ka neih tawh avangin ka mikhual tawh lo a, ka tlangnel tawh hle. Ka tawnhriat avangin inrintawkna ka neih phah a, ka fitness pawh a ṭha. Chak loh a thiang lo a, hneh ngei ka tum ang," tiin Vanglaini a hrilh.

Mizo tlangval hmachhawn tur Muhammad Sikandar Abbasi hian professional fight vawi kua a hmachhawn tawhah vawi nga a chak a, a khingpui ṭum hnih a knockout tawh a ni.

Knockout vawi 4-na?
Nutlai Lalbiakkima hi Mizo boxer zingah chuan hmelhriat hlawh ber zinga mi a ni a, Zokeite hming lem an pek NT-a hian professional fight vawi thum a hmachhawn tawhah a khingpui a knockout vek.

NT-a hian International Boxing Association Intercontinental title a kawl mek a, a inhnek hnuhnung berah Thailand boxer Gerttipong Kumsahwat chu round hnihna lekah a knockout.

Siaha tlangval NT-a chuan, "Kumsahwat kha ka beisei aiin a nem a, Grassroots Boxing nena kan inbiak pawhin ka tum tawk min pe rawh u, tih chu ka hrilh hmasak a ni," tiin a cho tawk hmachhawn a duh.

Grassroots Boxing-in NT-a tan hian Fida Muhammad an chhawpsak a, Mizo tlangval hian a vawi li nan a knockout thei ang em, tih chhanna chu zanin hian a hriat ang.

Dubai-ah Dinga
Tuipui tlangval Laldingliana'n professional fight vawi hnih a hmachhawn tawh a, Shubham Chauhan leh Rohit te knockout hmangin a hneh ve ve.

Dinga hian India ramah fight vawi hnih a nei tawh a, tun ṭum hi Dubai-a professional fight a hmachhawn hmasa ber tur a ni. LPS Profight-ah pawh champion tawh Dinga hi a technique a ṭhat avangin fak a hlawh a, zanin hian Muhammad Ammar Khan hmaah a theihna a pholang dawn.

JohnKenty a tel lo
Grassroots Boxing-in Dubai-a inhnek tur Mizo boxer an tlangzarh ṭumin JohnKenty Vanhlimpuia a tel a, amaherawhchu Dubai-ah Tuipui tlangval hi a inlan thei dawn lo.

India ram pawna inhnek tur a nih avangin JohnKenty hi a hnathawhna Navy lamin professional fight phalna an pe thei lo. Grassroots Boxing dintu Mujtaba Kamal chuan, "Inhnek tura JohnKenty kan tlangzarh khan phalna dil mek a ni a, tunah a rem leh ta lo. A inhnek theih nan theihtawp kan chhuah a, a tel lo tur hi pawi kan ti takzet," tiin a sawi.

Title Fight
Zanin hian Mizo boxer pathum bakah boxer ṭha rual an inlan dawn a, chung zinga langsar ber chu WBC International Bantamweight Title inchuh tur Guillermo Rigondeaux (Cuba) leh Vincent Astrolabio (Philippines) te an ni.

Cuban boxer ṭha Rigondeaux hi El Chacal 'The Jackal' hminglem an pe a, amateur leh professional fight-ah record a nei ṭha hle. Olympic Games leh World Championships-ah vawi hnih ve ve gold medal a lak hnuah World Cup-ah vawi thum gold medal a la.

Professional fight a luh hnuah pawh record a nei ṭha a, vawi 20 chakin vawi hnih chiah a chak lo. Cuban boxer hi World super bantamweight champion pawh a lo ni tawh a, amaherawhchu kum 41 mi a ni tawh. El Chacal hi Philippines boxer Vincent Astrolabio hmaah fiahin a awm ang.

Zonet Empai-ah a en theih
Dubai-a inhnek en awlsam dan ber chu TV hmangin a ni a, Zonet pawt tan mahni cable operator hnena Rs 100 pein a en theih. Zonet thlen lohna hmuna awmte leh Zonet pawt lo tan Zonet Empai app hmangin a en theih. Playstore aṭanngin Zonet Empai hi download tur a ni a, Rs 200 chawi a ngai thung.

Zonet Empai-ah hian Zonet kaltlanga tihchhuah football inelna lian Mizoram Premier League leh basketball inelna lian Mizoram Super League te bakah Zonet programme hrang hrang a en theih. Boxing en tura Rs 200 chawi rual hian Zonet Empai thla khat chhung atan an subscribe tihna a ni a, chutihrualin Zonet show dang en tura Rs 200 chawi te pawhin a thlawnin boxing an en thei ang.

Zonet hian Empai subscribe-na Rs 200 aṭangin Rs 100 zel chu tun ṭum boxing atan hian a dah hrang, inremna an ziah tawh sa angin boxer leh promoter te nen an insem leh ang. Sangtea hian dollar 3,100 (Rs 2,31,802.50) a hlawh dawn a, PPV aṭangin 8% a chang. NT-a hian dollar 3,000 (Rs 2,24,325) a hlawh dawn a, PPV aṭangin 7% a chang dawn. Dinga hian dollar 1000 (Rs 74,775) a hlawh dawn a, PPV aṭangin 2% a chang bawk ang.