Nadal hmaah Medvedev

Tennis world number 1 thar tur Daniil Medvedev chuan fiahna hautak a hmachhawn dawn. Russian tlangval hian tukin dar 9:30 hian Mexican Open semifinal-ah Rafael Nadal a hmachhawn ang.

Nimin quarterfinal inkhelah Nadal hian Tommy Paul chu 6-0, 7-6 (7-5) in a hneh, inkhel dangah Medvedev chuan a khingpui Japan tlangval Yoshihito Nishioka chu 6-2, 6-3 in a hneh ve bawk.

Russian tlangval hi ATP ranking chhuak tharah number 1 a ni dawn. Dubai Tennis Championship lamah Novak Djokovic a chet fuh loh bakah, world number 2 hian semifinal a thlen phak avang hian ranking lamah hma a sawn dawn a ni.

Number 1 ni dawn mah se Medvedev tan thil a awlsam vek lo mai thei. Vawiina a tum tur hi Nadal a ni miau a, player pahnih hi Australian Open final-ah khan an lo intawng tawh, inkhel hmuhnawm an chhawpchhuah leh ngei a rinawm.

Australian Open final kha darkar nga leh minute 24 an khel, inkhelh banah Medvedev hian, "I hah ve ngai lo a mi?" tiin Nadal hi fiamthuin a zawt. Tun ṭumah erawh set thum chauh khelh theih a ni dawn, chuvangin rei tak chu a ni thei dawn lo.