Chelsea vs Liverpool: Tu zawkin nge nomawi chawi dawn?

English football-a nomawi chawi harsat tawhzia hrechiangtu chu 'Big Six' hminglem an pekte an ni a, club ṭha an tam tawh avangin tun hmaa ngaihhlut hlawh tawk lo League Cup pawh a hlu ta hle.

Pathianni zan dar 10:00-ah League Cup final khel turin Chelsea leh Liverpool an intawng dawn a, Wembley Stadium-a inkhel tur an nihna ringawt pawh hian boruak a keng tel a, inkhel boruak a san loh ring suh.

Liverpool-in inelna pali an telnaah champion nomawi chawi an la beisei vek a, Pathianni zanah an chak ngat chuan an phur lehzual dawn - Reds fan-ten Wembley Stadium-ah hnehna hlado chham an duh dawn.

Chelsea tan Premier League beisei turin a sang hret tawh a, Champions League, FA Cup leh League Cup hi an la beisei chu a ni - League Cup-ah an champion chuan inelna danga champion turin an inringtawk sawt ang.

Chelsea an buai?
London club-in tun season-ah Club World Cup nomawi an chawi tawh a, talbuai anga sawi chu an duh lo mai thei. Mahse, tun hnaia an result en ila, Thomas Tuchel-a'n siamṭhat tur a nei tih chu chiang takin hmuh tur a awm.

Premier League-a an match hnuhnung pahnihah an chak ve ve a, mahse, an match hnuhnung zawka Crystal Palace an hneh dan entute chuan lungsi takin kha inkhel kha an en kher lo ang - minute 89-naah chakna goal an khung ve chauh.

Hei mai a ni lo - an league match hnuhnung parukah vawi thum draw an nei a, vawi khat an tlawm a, vawi hnih chiah an chak. Mahse, Blues hi final match pawimawh an neih hmain an insiamṭha hman.

Champions League last 16 first leg-ah Lille chu 2-0 in an hneh - an khel a hmuhnawm a, a bik takin N'Golo Kante che vel chu football mawina pho chhuaktu a tling. Liverpool tan French midfielder ngaihthah a thiang dawn lo.

Tu nge inlan ang?
Thomas Tuchel-a'n champion nomawi chawi a duh ngei ang tih a chiang a, Lille lakah Hakim Ziyech leh Mato Kovacic te inhliam mah se an hliam hi a na lutuk lo nia sawi a ni a, Tuchel-a'n a duh chuan zaninah a chhawr theih a rinawm.

Tlarhmaah Romelu Lukaku-a'n a man phu angin a la khel chhuak lo a, Lille lakah phei chuan bench lamah a ṭhu tluan. Tuchel-a'n Pathianni zanah Belgian striker hi a ring thut lo a nih pawhin mak ti suh.

Inter Milan ngaia lungleng striker hian tun hnaia chanchin thar ber a neih chu, hlawh tihniama Milan khawpuia kir a hreh lo, tih hi a ni a, khelh ṭhat loh kara boruak nei ṭha lo reng striker hi chhawr a châkawm loh ang.

Lille lakah Kai Havertz-a'n striker hna a lo chelh tawh a, goal a khung bakah nuam ti takin a khel. Zaninah German forward hian a laiah bul a ṭan leh ngei a rinawm a, a thlak turin Timo Werner a la awm cheu bawk.

Kan vai tan...
Jurgen Klopp-a'n tun season League Cup-ah player a chhawr kual nasa a, academy player thlengin hmuh tur an awm ṭhin - German coach hian final lut turin player 29 ngawt a chhawr tawh.

Klopp chuan, "Game tin kha a harsa em em vek a, chuvang chuan player pawh kan thlak danglam nasain, naupang tak tak pawh kan hmang nual a ni," a ti a, final kalkawngah hian Norwich City, Preston North End, Leicester City leh Arsenal an pet chhuak.

German coach chuan sawi zawmin, "Kan champion thei ta hlauh a nih chuan kan vai tan a ni ang - a bik takin kan academy tan a ni lehzual ang. Academy under-18 leh U23 player thlengin kan chhawr a, an vaiin an khel ṭha em em vek a ni," a ti.

Liverpool tan league-a hmun chang tam lo zingah Takumi Minamino a khel ṭha lehzual a, EFL Cup match nga aṭangin goal li a khung a, assist vawi khat a nei bawk - zaninah bul a ṭan a nih pawhin a mak lo ang.

Reds an vanglai!
December 29-a Leicester an ngam loh hnuah Liverpool-in inelna hrang hrangah match 12 khelin tlawm an la nei lo a, vawi hnih draw neiin vawi 10 ngawt a zawnin an chak thei - an nep lo hle.

Reds hian an match hnuhnung berah Leeds United chu 6-0 ngawtin an sawp bawk a, an thiampuipa Mohamed Salah leh Sadio Mane ten goal hnih ve ve an khung a, Chelsea tan hmuh a nuam lo mai thei. Klopp-a'n zaninah Salah leh Mane bul a ṭantir ngei a rinawm a, anmahni thlawp turin Luis Diaz emaw Minamino emaw lut tura ngaih an ni.

Roberto Firmino a inhliam a, Diogo Jota-a'n dam lam panin final khelh a tum thu sawi mah se bul ṭan nghal ngawt tura rin erawh a harsa - a hun taka rah ṭhin Divock Origi an nei tih hriat telsak ila.

Liverpool boss Klopp-a'n final hruai thlengtu, second choice keeper Caoimhin Kelleher thlak tumna a neih loh thu a sawi tawh a, Alisson Becker aiah Irish keeper hian bul a ṭan tura ngaih a ni - League Cup-a match nga an khelhah vawi thum si ban a nghak.