Football khawvelin Ukraine a thlawp

Russia-in khawvel barakhaihin Ukraine a run a, nunau tam tak hlau thlabarin an tlanchhia a, football khawvel pawhin Ukraine-a Russia nunrawnna chu a hmuh hmaih lo - kar laihawl inkhelah footballer leh fan ten Ukraine an thlawpna an tilang nasa hle.

Ukraine international Ruslan Malinovskyi chuan Atalanta tan 3-0 a Olympiakos an hnehna inkhelah goal hnih a khung a, Europa League knockout playoff inkhelah hian a jersey hlimin, "Ukraine-ah indona tawp rawh se," tih inziahna chu a pholang.

Ningani zan Europa League-a Russian club inlan awmchhun Zenit St Petersburg chuan khualmualah Real Betis an lenchilh a, Betis fan-ten Ukraine flag keng chungin Russian club hi an lo tih el - Zenit bench-ah hian Ukraine tana vawi 54 inlan tawh Yaroslav Rakitskiy a awm!

Manchester City defender Oleksandr Zinchenko pawh an ram Ukraine a thlawp a ni tih lantir nan Manchester khawpuia Ukraine thlawpna lantirna hmunah a tel ve.

Barcelona leh Napoli player ten an inkhelh hmain banner lian tak, "Indona titawp rawh u," tih ziak chu thla an lakpui a, Croatian club Dinamo Zagreb fan-te chuan Sevilla an mikhualna inkhelah, "Ukraine mipui kan thlawp tlat e," tih inziahna banner an pholang ve bawk.

Norwegian club Bodo/Glimt ṭantute chuan Celtic nen an inkhelah Ukraine an thlawpzia lantir nan Ukraine flag an pholang nual a, Ukraine mipui tan an ding.

Czech club ṭha Slavia Prague player-te chuan Europa Conference League-a Turkish club Fenerbahce nen an inkhelh hmain Ukraine T-shirt an ha a, "Ukraine lam kan ṭang tlat a ni," tih chu he T-shirt ah hian a inziak - he inkhelah hian Ukraine international defender Taras Kacharaba chu captain atan an hmang bawk.

UEFA chuan Champions League final khelhna chu Saint Petersburg aṭangin Paris-ah an sawn a, nomawi inchuhna hi May 28 hian Stade de France-ah khelh a ni dawn. Europe inelnaa Russia leh Ukraine club la damte chuan home match chu neutral venue-ah khelh a ṭul dawn bawk.