Belgium-in England beiseina an titawp

England-in UEFA Nations League finals luh an beiseina chu a thamral ta a, Pathianni zan khan Belgium 2-0 a an hneh loh avangin finals hi an lut thei tawh lo. 

Belgium tan Youri Tielemans leh Dries Mertens-ten goal khat ve ve an khung a, England-in inkhel thunun mah se a pawimawh ber goal an khung theih miau loh avangin a tlawm zawkah an ṭang. 

Three Lions laka hnehna an chan avangin Belgium hian match khat khelh tur la awmah point 12 an nei a, England hian an match hnuhnung ber Nilaini zan dar 1:15-ah Iceland hneh pawh ni se point sarih an neih mek avangin Belgium an um pha thei tawh lo. 

League A2 inkhel dangah Denmark chuan 2-1 in Iceland an hneh a, Christian Eriksen  chuan penalty hmanga goal hnih khungin Iceland tan Vidar Orn Kjartansson chuan goal khat a khung.

Nilaini zan dar 1:15-ah Denmark leh Belgium an intawng dawn a, Denmark tan finals lut tura chak a ṭul laiin Belgium tan draw result a tawk thung. 

Belgium khelmuala inkhelah mualneitu lamin goal an khung hma a, English football hrechiangtu Leicester City midfielder Youri Tielemans chuan minute 10-na lekah goal hmahruai a khung - yard 20 vela hla aṭanga a pet hian Tyrone Mings perin goalkeeper Jordan Pickford tan dan theih a ni lo. 

England tan Harry Kane-a'n si phurh sutna remchang nei mah se Belgium striker  Romelu Lukaku chuan Kane-a ball tauh chu line aṭangin a lo tauh chhuak hman a, Belgium an vannei. 

Minute 23-na a ni a, Belgium an vannei nawn - Declan Rice chu Kevin de Bruyne laka foul-ah referee-in a ngai a, sawisel theih tak turin freekick a pe. Belgium tan Dries Mertens chuan freekick hi mawi zetin goal-ah a chantir a, England player tan thlir liam mai loh chu tih theih a tlem hle. 

England-in goal hnih an chhuah hnuah ball an chang tam zawk a, shot pawh vawi 16 ngawt an nei - mahse chance hlauhawm tia sawi tur em an nei thei lo a, a tawpah a tlawm zawkah an ṭang. 

Three Lions hian Wembley-ah Belgium hi 2-1 in an lo hneh tawh a, mahse a hnu lawkah Harry Maguire-a red card hmuhna inkhelah Denmark an ngam lo zui - Nations League finals an luh loh phah ta a, khualmuala Belgium ngam loh hi a awm ve reng a nih pawhin Wembley-a Denmark an ngam loh kha inenfiahna tur pakhat a ni. 

England boss Gareth Southgate-a'n Euro 2020 thlir chungin a team khelh dan a siksawi fo a, friendly match-a 3-0 a Ireland an hneh ṭumin 3-4-3 hmang mah se Belgium lakah erawh a hman uar ber leh duh ber tih ngam 3-4-2-1 a hmang thung. 

3-4-2-1 formation-ah hian defender chu panga angin an awm a, hliam vanga lakchhuah ngai Chelsea left-back Ben Chilwell leh Kieran Trippier-ten tlarhma puih hna mual sirah dingin an thawk tel. 

Tlarhnung pathumah Mings, Eric Dier leh Kyle Walker an ding a, an hma midfield-ah Declan Rice leh Jordan Henderson inkawpin Jack Grealish leh Mason Mount ten Kane an thlawp thung. 

Mahse, he formation-ah hian England player-te hi an bel tak tak thei lo niin a lang a, Southagate-a'n a ngaihtuahna a sen nawn a ṭul mai thei. 

Chutihrual chuan South-gate-a'n a duh angin player a rem bik lo tih hriat a ṭha a, tlarhmaah Raheem Sterling leh Marcus Rashford dam ṭha se chuan Kane thlawptu tur an ni - Sterling aia bul ṭantir Grealish erawhin a khel ṭha hle. 

-    UEFA-in friendly match tam zawk thlakna atan Nations League hi an buatsaih a, football ngainatuten ram inelna an ngaihhlut theih nana tih a ni.

-    Kum 2018 aṭang khan khelh ṭan a ni a, UEFA hnuaia ram 55 hnuaia ram 55 chu league pali League A, League B, League C leh League D-ah ṭhen an ni.

-    Engtin nge champion an zawn? Nations League-ah hian League A aṭangin chauhin a champion theih. League A-a group pali aṭangin a sang ber ṭheuhin finals an lut. Finals hi semifinal leh final-ah ṭhenhran a ni a, 2020–21 season finals hi October 6-10, 2021-ah khelh a ni dawn.

-    2018-19 season-ah Portugal, Netherlands, England leh Switzerland ten finals an lut a, Portugal chu champion hmasa ber a ni.

-    2020–21 UEFA Nations League-ah inelna kalphung an thlak a; League A leh League B-a team pathum chauh awm ṭhin chu team pali ve veah an ti tam. League D-ah team an dah tlem ta thung a, league hniam berah hian team sarih chauh an awm.

-    League A group tina a hniam ber chu League B-ah an tla thla dawn a, League B-a sang ber hi League A-ah an kai chho thung. League D bikah hian a tlak hniam lehna tur a awm tawh lo a, a bak league pathuma table mawngphaha awm te chu tlahniam thei vek an ni.