Ronaldo hmaah Croatia

Portugal-in inkhel pawimawha France an hneh loh avangin UEFA Nations League nomawi an humhim thei dawn lo a, zanin dar 1:15-a Croatia nena an inkhel tur pawh hi a pawimawhna a hniam sawt. Chutihrualin Croatia tan erawh League A-a awm chhunzawm turin chak a ṭul a, France kutah an innghat bawk.

Group 3 inkhel dangah France leh Sweden an inkhel dawn a, Les Bleus-in hnehna an chang a nih chuan Croatia hi chak lo mah se League A-ah an awm chhunzawm ang.

Cristiano Ronaldo-a'n ram tan goal 102 a khung tawh a, Iran striker Ali Daei record khum turin goal riat a la mamawh. Juventus forward hian France lakah goal a khung lo a, hemi hmaa Andorra nen friendly match an khelh ṭumin bench ṭanga lutin goal a khung.

Portugal  coach Fernando Santos chuan, "Mi tam tak chuan Cristiano hian Andorra lakah lut se, goal khung ṭeuh se record a khum phah turah an ngai.

Amaherawhchu Ronaldo hian ram tana goal khung tam ber record siam turin Andorra laka khung ṭeuh a mamawh lo, record hi a siam dawn tho tho," tiin kum 2006-a football chawlhsan Ali Daei record a khum ngei a rin thu a sawi.

Kum 35 mi Ronaldo hian Croatia lakah hian kum 2013 khan goal khat a khung a, an intawnna hi friendly match a ni. Manchester United leh Real Madrid forward hlui hi ram langsar laka goal a khung tam tawk loh avangin a record sawi hnawng pawl an awm a, Ronaldo tan Croatia laka goal khung hi amah seltute ka hup nan a pawimawh ang.