ISL: Mizo player hlutna a sang

India rama club football inelna ngaihhlut hlawh ber Indian Super League chu November 20 khian khelh ṭan a ni dawn ta a, Mizoram aṭangin player 30 ngawtin inelna hi an hmachhawn dawn.

 

Season hmasa ISL-ah khan Mizoram aṭangin player 22-in Indian top flight football league hi an khel a, player pariatin tun season-ah an pung tihna a ni. 

Germany-a hmunpui nei, footballer hlutna chhut ṭhin Transfermarkt chuan ISL lo awm tur atana Mizo player hlutna an chhut a, Mizo player-te hlutna hi vaibelchhe 24 a tling!

Hriat tel tur erawh Transfer-markt hian Mizoram player aṭang ringawtin player hlutna hi a chhut lo a, Silchar tlangval, NorthEast United tana khel Alfred Lalroutsanga hlutna chu belh a ni. 

Alfred bakah hian Trans-fermarkt-in Mizo player hlutna a chhut tel zingah Odisha FC tana khel defender Jones Lalṭhakima leh midfielder  CVL Remtluanga an tel bawk a, anni pahnih hi senior squad-ah awm mah se ISL khel tur squad-ah an tel rih lo. 

ISL-a player zawng zawng hlutna belhkhawm hi vaibelchhe 458 a tling a, chuta ṭanga Mizo player hlutna chu vaibelchhe 24-a ni - ISL hlutnaah Mizo player-in 5% an thawh phak tihna a ni a, a nep lo hle. 

Mizo player zinga hlu ber chu Lallianzuala Chhangte a ni a, Lunglei tlangval hlutna hi India pawisain maktaduai 14.58 a ni a, a hnuaiah hian maktaduai 12.50 hlutna nei Mizo player pali an awm. 

Kelkang tlangval Lalkhaw-puimawia, Durtlang tlangval tawnhriat nei ṭha Ricky Lallawmawma,  Kolasib tlangval nomawi chawi thiam William Lalnunfela leh Bethlehem Vengthlang tlangval K. Lalṭhathanga-te chu maktaduai 12.50 ṭheuh hlutna nei anga chhut an ni. 

Khawpuimawia leh William-a tan tun season hi ISL an khelh vawi khatna tur a ni a, Ricky leh Puitea tia hriat lar K. Lalṭhathanga te erawh ISL-a lo tlangnel tawh sa an ni thung. 

Mizo player hlu zual top 10-ah NorthEast United forward Rochharzela, Odisha FC midfielder Paul Ramfangzauva, Jerry Mawihmingthanga & Isak Vanlalruatfela, Bengaluru goalkeeper Lalthuammawia Ralte leh defender Joe Zoherliana-te an awm a, an hlutna hi maktaduai 10.42 vek a ni. 

Player hlutna hi awlsam taka chhut ringawt a ni lo a, an kum zat, an khelh ṭhat dan, an contract hlut zawng leh thil dang tam tak chhut a ni a, chuta ṭang chuan an hlutna hi belh khawm a ni. 

Hriat tur chu player hlutna hi an hlawh zat a ni lo a, an hlawh hi chu a hranin a kal tih hriat a ṭha a, an man zat pawh a ni lo - hei aia to daih hian hralh an ni thei a, a aia tlawm zawk pawh a ni daih theih. 

Transfermarkt India hotupa Babua Biswas chuan, "Germany-a hmunpui nei kan nih angin kan hmunpui ami ten player hlutna hi uluk takin an chhut a ni. 

"Chutihrual chuan an hlutna zat hi 'a dik vek e' tia 100% a pawm tlat tur erawh a ni bik lo. Season a her chhuak ang a, chuta an khelh dan a zir thlengin an hlutna hi a tlahniamin a sang leh thei," tiin Vanglaini a hrilh. 

Mizo player zinga S. Malsawmtluanga (Mama) hnua Mizo zinga hriat hlawh bera chhal ngam chu Jeje Lalpekhlua a ni a, Hnahthial tlangval hian season tharah East Bengal tan a khel dawn.

Chennaiyin forward hlui hlutna hi mi tam tak rilruah a awm dawn tih a chiang a, India international striker hi maktaduai 8.33 a ni - Jeje hlutna hniam chhan hi season hmasa tluana a inkhelh loh vang a ni. 

Tuna hlutna teh a nih hmaa Jeje hlutna chu maktaduai 16.66 a ni a, a career-a a hlutna san lai berin maktaduai 20.83 hlutna a nei thei - hetih hun lai aṭanga teh chuan Jeje hlutna hi a tlahniam nasa hle. 

Babua chuan, "Player hi an kum a upatin an hlutna a tlahniam ve zel bawk a, a bik takin kum 30 an kai chhoh hian an hlutna hi a tlahniam nghal. Chutihrual chuan player danglam bik erawh an awm. 

"Sunil Chhetri hi kum 36 ni tawh mah se season tina a la khelh ṭhat miau avangin a kum zatin a hlutna hniam pui mah se a tla thla duai ve thei lo," tiin Vanglaini a hrilh a, Chhetri hlutna hi maktaduai 25 a ni - hemi hmaa a hlutna hi maktaduai 29.16 chiah a ni.

 

Tun season-ah ISL la khel ngai lo Mizoram player an awm nual a, I League club Aizawl FC aṭangin ISL-a pem thar player panga ngawt an awm - AFC aṭanga Indian football hmelhriat hlawh player engemaw zatin ISL an khel dawn bawk. 

Season hmasaa Aizawl FC tana khel aṭangin midfielder Isak Vanlalruatfela (Odisha FC), midfielder Paul Ramfangzauva (Odisha FC),  forward Rochharzela (NorthEast United), forward William Lalnunfela (Jamshedpur FC) leh defender Joe Zoherliana (Bengaluru FC)-te chuan club thar an zawm a, a vawi khat nan ISL an khel dawn. 

East Bengal defender Lalram-chullova hian Indian football-ah hmelhriat hlawh tawh viau mah se tun season hi ISL-a khelh vawi khatna tur a ni a, Churchill Brothers aṭanga Highlander zawmtu Khawpuimawia'n (Mapuia) a vawi khat nan ISL-a khel ve dawn bawk. 

Indian Arrows tana khel ṭhin, goalkeeper Lalbiakhlua Jongte chu Hyderabad FC tan a khel dawn a, ani hi Indian keeper beiseiawm pawla sawi a nih avangin khelhna hmun a chan chuan en bik a hlawh dawn. 

Hyderabad midfielder Mark Zothanpuia,  Hyderabad forward Lalawmpuia, Bengaluru midfielder Emanuel Lalchhanchhuaha leh Odisha FC midfielder S. Lalhrezuala te hi ISL club-a lo awm sa tawh ni hlawm mah se tun season hi ISL-a senior team tana an inlan hmasak ber tur a ni ang. 

ATK Mohun Bagan: Mizo awm lo

Bengaluru: Lalthuammawia Ralte (goalkeeper), Joe Zoherliana (defender), Emanuel Lalchhanchhuaha (midfielder), Edmund Lalrindika (striker), 

Chennaiyin: Jerry Lalrinzuala (defender), Lalchhuanmawia Fanai (defender), Lallianzuala Chhangte (midfielder)

FC Goa: Mizo awm lo

Hyderabad FC: Lalbiakhlua Jongte (goalkeeper), Laldanmawia Ralte (midfielder), Mark Zothanpuia (midfielder), Lalawmpuia (forward)

Jamshedpur FC: Laldinliana Renthlei (defender), Ricky Lallawmawma (defender), Isaac Vanmalsawma (midfielder), William Lalnunfela (forward)

Kerala Blasters FC: Lalruatthara (defender), Lalṭhathanga Khawlhring (midfielder)

Mumbai City FC: Hmingthanmawia (defender)

NorthEast United FC: Lalengmawia (midfielder), Lalrempuia Fanai (midfielder), Rochharzela (midfielder), Alfred Lalroutsang (midfielder),  Lalkhawpuimawia (forward)

Odisha FC: Jones Lalṭhakima (defender),  Isak Vanlalruatfela (midfielder), Jerry Mawihmingthanga (midfielder), S. Lalhrezuala (midfielder), Paul Ramfangzauva (midfielder), Samuel Lalmuanpuia (midfielder), CVL Remtluanga (midfielder), Daniel Lalhlimpuia (striker)

SC East Bengal: Lalramchullova (defender), Jeje Lalpekhlua (striker).