Semifinal-ah Chanmari tan hmun a awm em?
Mc Dowell's No. 1 Soda Mizoram Premier League Season 7-ah vawi hnih champion tawh Chanmari FC chu panganaah an awm mek a, semifinal thleng thei lo dinhmunah an ding. Vawiin tlai dar 3:00-ah Chanmari FC hian champion lai Chhinga Veng FC an hmachhawn ang a, hei hian an hmalam hun thui tak a hril ang.
Phurna a awm
Chanmari FC hian Serchhip-ah Chhinga Veng an hneh lo a, coach Lalruatliana Sailo thlak nan Chawngthansanga an lalut. Coach thar hnuaia an match hmasa berah Chanmarians-in Mizoram Police an hneh lo nghal a, point hlawh chhuak lo mah se an khelh danah erawh an lawm thung.
Coach Chawnga chuan, "Chhinga Veng kan hmachawn hun hi kan tan chuan a lawmawm zawkah kan ngai. A chhan chu champion lai, league hmahruaitu leh tun season-a chak loh la nei lo hi kan hneh thei a nih chuan kan dinhmun mai bakah vengchhung mipui boruak thlenga a vawrh san theih vang a ni," tiin Vanglaini a hrilh.
Chanmari coach-in a êng zawngin a thlir a, player-te pawhin dinhmun sang zawk thlen an duh a nih chuan coach hma thlir an ṭawmpui a ṭul dawn. Chutihrualin a thim zawnga an thlir a, an chak zo lo a nih chuan team dang Chhingcows bakah Electric FC, Aizawl FC leh Mizoram Police ten an tlansan thei ang.
Chanmari dah santu Sanga
Chhinga Vengin tun MPL mai ni lo tun season-ah hneh loh an la tawng lo a, chutichung chuan coach Lalsangzuala Hmar a ṭawng fimkhur hle.
Chhingcows coach Sanga chuan, "Player inhliam kan nei nual a, tuna kan dinhmun thlir chuan Chanmari laka point khat kan hlawh chhuak a nih chuan kan lawm khawp ang. Team ṭha tak an ni a, player thlir chuan keini aiin an ṭha zawk. Chuvangin awm ze loa kan nawr vak a nih chuan min vaw let thei tih kan hria a, fimkhur takin kan khel ang," tiin point khata a lungawi thu a sawi.
Inkhingtawk tur
Chhinga Vengin inhliam vangin midfiel-der pawimawh Lalrinchhana (R.Ch-a), winger F. Lalnuntluanga bakah defender Hmingthanmawia leh Vanlalzuidika te an chhawr thei dawn lo a, an intawn hnuhnun ber ṭuma chakna goal khungtu Lalrammawia dinhmun a chiang lo bawk.
Chhingcows hian an player pawimawh chhawr thei lo mah se coach Sanga hi player siksawi thiam ber zinga mi a ni a; MS Dawngliana, Lalromawia leh Jacob Lalrawngbawla te an la kawl a, tlarhnungah keeper Zothanmawia leh PC Laldinpuia te an din bawk avangin Chanmari hneh thei tur an la kawl.
Chanmari FC-in tlarhnung tihchhah nan Aizawl FC defender hlui Immanuel HS Lalṭhazuala an lalut a, Bawngkawn tlangval hi vawiinah bul a ṭan erawh a rinawm loh. Chutihrualin captain C. Lalrosanga pawh hrem vanga match hnih a khelh theih loh hnuah match hnih awltir a ni leh a, Chhinga Veng hmachhawn tur chuan a tawnhriat hi a pawimawh ang.
Chanmarians coach Chawngthansanga chuan, "Chhinga Veng an che rang a, an game milin kan khelh ve a ṭul dawn. Player thlan tur position tinah kan nei a, uluk takin ka thlang ang," tiin an player neih dan chu a lungawithlak thu a sawi.