United-in Juventus elpha lo

Juventus-in Thawhlehni zan khan Old Trafford-ah Manchester United chu Paulo Dybala goal hmangin 1-0 in an hneh.

United hian an mualah hnehna chang zo lo mah se UEFA Champions League group H inkhel dangah Young Boys leh Valencia te 1-1 a an inhnehtawk avangin pahnihna dinhmun an hauh chhunzawm zel.

Ronaldo a kir

Old Trafford-ah Cris-tiano Ronaldo-a'n hmun pawimawh a la chang reng a, Juventus kawr ha mah se ṭantu a la ngah hle.

Juve-in inkhel an thunun a, minute 17-na leka Portuguese forward cross chu Paulo Dybala chuan a pet goal. First half-ah hian United-in vawi khat chauh attempt an neih laiin Italian champion hian 70% zet ball chang chungin vawi 10 attempt an nei a, English club-in an elpha lo.

Premier League-a 10-naa awm mek United leh Italian champion lai leh hmahruai mektu Juventus an inthlau deuh a, Paul Pogba-a'n second half-a goal ban a pet per tih loh chu Italian club tlarhnung tan buaina tur a awm lo.

Inkhelh zawhah Ronal-do chu khelmual chhuahsan hnuhnung ber a ni a, United a la hmangaih reng tih lantir nan a kutin a awm a dawm a, Old Trafford kil tin aṭangin amah lawmtu thawm a la ṭha hle.

Allegri a lawm

United-in November 7 zanah Juventus khelmual an tlawh ang a, Italian club hian hnehna an chang a nih chuan match li khelh lek aṭangin knockout stage an lut ang.

Juve boss Massimiliano Allegri chuan, "Kan khelh dan a bik takin first half a lungawi thlak hle. United-in tharum an ngah avangin an game-a kan luh a thiang lo a, goal khat dang khung belh thei tur kan ni," tiin chak phu zawk an nih thu a sawi.

Juve faktu Mourinho

Manchester United manager Jose Mourinho chuan, "First half-ah inkhel an thunun a, second half-ah goal venhim hna an thawk ṭha. An central defender Giorgio Chiellini leh Leo-nardo Bonucci te khan an hna kha an hnehsawh em em a, goal venhim dan Harvard University-a zirtir thei turin an ṭha a ni," tiin Juventus tlarhnung a fak.

An khingpui chung-chang sawi chhunzawmin Mourinho chuan, "An tlarhnung a ngheh ṭhat avangin Ronaldo leh Dybala ten zalen takin an khelh theih phah a. Keini aiin Juventus an ṭha zawk a, chu chu thudik tak chu a ni. Ka naute khelh dan chungchangah sawisel tur erawh ka nei lo," tiin a sawi.