Zanin dar 8:00-ah Khatla TBL leh Tuikual South

GIG Motors Mizoram Super League Season 5-ah Khatla TBL inlan hun a thleng ta a, vawi hnih champion tawh team hi American basketball player Vernon Young hoin zaninah an thawk chhuak dawn. Zanin dar 8:00-ah TBL-in state pawn coach Vivek Pandey hnuaia khel Tuikual South an hmachhawn dawn a, a hmuhnawm khawp ang.

Young vs Desmond?

Khatla TBL-in MSL hmasa pahnihah an champion hnuah nomawi an chawi leh lo, coach H. Laldinsanga chuan, "Champion kan duh vangin a nia, Vernon Young kan lakluh. A vawi thum nan champion ngei kan duh a, chumi tur chuan squad pawh kan la ṭha a ni," tiin an player neih dana a lungawi thu a sawi.

TBL player Vernon Young hi Chicago, Illinois-a sei lian a ni a. NCAA-ah Lincoln University tan khelin kum 2017 khan NBA Draft-ah a tel pha a, feet ruk leh inches sarih zeta sang a ni a, inkhel danglamna thlentir theitu leh inkhel hmuhnawmna lantir thei a ni ang.

Tuikual South pawhin foreigner an nei dawn a, ruahman dan chuan vawiin hian Mizoram a rawn thlen beisei a ni. TKS manager Lalremsiama Hrahsel chuan, "Desmond hian Khalta TBL a hmachhawn hman kan beisei a, amaherawhchu 100% chuan kan chiang lo," tiin Desmond Antwine Medder a chungchanga sawi.

Desmond hi feet ruk leh inches hniha sang a ni a, Mizo player ṭhenkhat nen an inchen tawk avangin a lenna a hmachhuan thei lo ang. Amaherawhchu Phoenix, Arizona-a seilian Desmond hi thiamna lamah chuan Mizo te u en tur niin a lang a, en a châkawm tawh hle.

TKS hian Desmond bakah hian 6ft 5in a sang Shashank J Rai an kawl a, ani hi 3x3 Pro Basketball-ah ṭha takin a khel a, Aizawl a thlenna a rei tawh bawk avangin MSL hmasa berah pawh khel ṭha tura beisei a ni.

Incho tawn

Tuikual South manager Siamtea chuan, "Khatla TBL an ṭha tih hre mah ila kan hlau lo. MSL hnuhnung pahnihah kan hneh ve ve a, kan player-te hi khel ho sa vek an ni a, combination awm sa a ni a. Coach thar Vivek hi training-naah a fakawm em em a, kan ṭhat pui ngei kan ring," tiin match hmasa ber aṭanga chak an tum thu a sawi.

Vivek hian Ger-many-ah diploma in basketball coaching a zir chhuak a, Zarkawt BCA leh Republic VR4 te enkawl tawhtu Liansangkima'n a pui bawk.

Khatla TBL coach Mapuia chuan, "Tuikual South hi team ṭha zinga mi an ni a, kan chak erawh ka ring," tiin ṭum dang thoin a inringtawk. Mizo zinga India tana khel hmasa ber leh India team enkawltu zinga tel hmasa ber Mapuia hi MSL hmasa berah MVP a ni a, zaninah pawh coach nichungin player pawimawh a ni ang.