Zaninah Aizawl FC leh BVT

Aizawl FC-in zanin dar 7:00 hian table mawngphaha awm Bethlehem Vengthlang FC an hmachhawn dawn a, AFC-in I League nen an khelh kawp a ṭul dawn avangin Mizoram Premier League a an dinhmun a ṭha lo.

Gift Raikhan-a hote hi I League-in a tih buai hauh hmain MPL-ah match riat an khel a, vawi thum chiah chakin point 13 an hlawh chhuak a, pathumna dinhmun a hauh mek. Tunah erawh I League milin player an thlan a ṭul dawn a, Pathianni tlai dar 5:00-a Shillong Lajong nen an inhmachhawn dawn avangin BVT lakah an player ṭha ber an chhawr thei lo ang.

AFC coach Gift Raikhan chuan, "Aizawl FC ka awm hmain club thuneituten Mizo player ṭha an la khawm tawh a, kan team tana ṭha tura an rin chu kei pawhin kan ring ngam tur a ni," tiin player an siksawi tur thu Vanglaini a hrilh.

Bethlehem Vengthlang FC erawh team nem ber anga ngaih theih a ni a, vawi riat an khelh tawhah chak la nei loin point hnih chiah an la hlawh chhuak. BVT coach H. Lalhlimpuia chuan, "Table mawngphaha awm hi nuam kan ti bik lo a, hemi chhuahsan tur hian kan ṭang dawn. Aizawl FC hi kan nawr ngam lohna chhan tur hi ka hre lo a, Serchhip-a kan inhmachhawn ṭum nen a inang lo ang," tiin a sawi.

Serchhip-a team pahnih inhma-chhawn ṭum khan Aizawl FC-in an foreigner thar Ansumana Kromah an chhawr ṭan a, 4-1 in hnehna an chang. Amaherawhchu, Lammualah AFC hian Kromah tel loin Chawnpui nen an inhnehtawk a, an player ṭha ṭhenkhat an awltir leh a nih bawk chuan BVT laka chak chiangsaa dah a rem tawh lo.

# Team Pld W D L GF GA GD Pts
1 Chhinga Veng FC 8 7 1 0 11 3 8 22
2 Electric Veng FC 8 5 1 2 12 8 4 16
3 Aizawl FC 8 3 4 1 15 9 6 13
4 Mizoram Police 8 4 0 4 11 8 3 12
5 Chanmari FC 8 3 1 4 9 12 -3 10
6 Chawnpui FC 8 1 5 2 8 9 -1 8
7 Ramhlun North 8 1 2 5 9 18 -9 5
8 Bethlehem VT 8 0 2 6 8 16 -8 2