Season thar atan I League tlangzarh
India rama club football inelna sang ber I League chu tlangzarh a ni ta a, thla ruk chhunga khelh zawh tura ruahman league hi October 26 aṭangin khelh ṭan a ni dawn - Chennai City FC chuan Coimbatore khawpuiah Indian Arrows an mikhual ang.
I League vawi 12-naah hian Jammu & Kashmir chuan a vawi khat nan team an thawh ve dawn a, second division champion Real Kashmir FC chuan I League hi an khel dawn.
Rangers legend David Robertson enkawlna hnuaia khel Real Kashmir hian Indian football-a an season hmasa berah mipui an barakhaih ṭan nghal der - adidas kut chhuak jersey an ha dawn a, inremna an neihpui tawh.
Tun season I League-ah hian state sawm aṭangin club 11 an inel dawn a, champion hian vaibelchhe khat an dawng ang a, pahnihnain nuai 60 an dawng ang.
I League hi Star Sports chuan live-a en theih turin a pe chhuak ṭhin dawn a, online-a en duh tan Hotstar leh Jio TV-ah te a en theih ṭhin dawn bawk a ni.
I League-a inlan tur club te;
Minerva Punjab FC (Punjab), Aizawl FC (Mizoram), NEROCA FC (Manipur), Shillong Lajong FC (Meghalaya), Mohun Bagan & Quess East Bengal (West Bengal), Gokulam Kerala FC (Kerala), Churchill Brothers FC Goa (Goa), Indian Arrows, Chennai City FC (Tamil Nadu), Real Kashmir FC (Jammu & Kashmir).