Federer-a'n second round a lut

Roger Federer chuan seeded chang phak lo Filip Krajinovic lakah set khat hloh mah se hnehna a chang tho a, a inkhelh thiamna hmun Swiss Indoors Tournament-ah match 16 chhung hnehna a chang zawn ta.

World number 3 Fede­rer hian Basel-ah hian nomawi vawi riat a chawi tawh a, a vawi kua nan champion a tum; a match hmasa berah Serbian tlangval hi 6-2, 4-6, 6-4 in a hneh.

Kum 37 mi Federer hian kumin chhung thoin Indian Wells Masters-ah Krajinovic hi a hneh tawh tho a, tun ṭum an intawn­ah hian a service vawi li ngawt hloh mah se, a khingpui service hi ṭum ruk a chhuhsak ve thung a ni.

Grand Slam vawi 20 champion tawh Federer chuan, "6-2, 3-1 a ni hman a, a lan dan kha chuan kan khel zo hma hle dawn niin a ngaih theih. Mahse, ka service a ṭha tawk lo a, ka chak tawk lohna laiah tak khan ka khingpuiin min rawn bei let a ni. Tun hma lama ka sawi tawh ang khan tournament kan khel a nih chuan round hmasa ber hi hriatthiam a harsa ṭhin a ni," tiin a sawi.

Inkhel dangah John Isner chuan ATP Finals khelh a beiseina chhi nung zel turin Cameron Norrie chu 6-7 (1-7), 6-4, 7-6 (9-7) in a hneh a ni. Player ṭha pariat inelna hmachhawn beisei phak Dominic Thiem, Kei Nishikori leh Fabio Fognini te pawhin hnehna an chang vek a ni.