Vawi thum chak zawn Pistons

Detroit Pistons chuan NBA regular season an hman ṭhat chhawm nung zelin Philadelphia 76ers chu 133-132 in an hneh a, an match hmasa pathum an khelh tawhah hnehna an chang vek.

Little Caesars Arena-a inkhelah Pristons tan Blake Griffin chuan point 50 zet a score a, basket­ball inelna sang a khelh china a chetṭhat ber ṭum a ni; ani hian rebound vawi 14 a lak bakah assist vawi ruk a nei bawk a ni.

Griffin bakah hian Reggie Jackson a khel ṭha a, point 23 a score. Anni pahnih hnungah hian Ish Smith (21 points), Center Andre Drummond (14) te an khel chhe lo hle bawk.

Kum 29 mi Griffin chuan, "Kan thawkrim em em a, court chhung kan luh hma hian hnehna chang thei kan nih zia kan inhrilh nawn ṭhin. Season bul kan ṭan chauh a ni a, kawng zawh tur kan la neih thui em avangin match khat zel bak ngaih­tuah lawk theih a ni rih lo," a ti.

Philadelphia tan point 33 a score bakah rebounds vawi 11 latu Joel Embiid chu player langsar ber a ni a, 1990-91 season hnuah Em­bid hi 76ers player zingah a zawna match thum chhung point 30 score tling thei a ni a, khel ṭha viau mah se a ṭhiante lam aṭanga thlawpna a hmuh ṭhat tawk loh avangin a vanduai zawkah an ṭang.