Chennaiyin chak thei lo
Indian Super League-ah champion lai Chennaiyin FC an chak thei lo. Thawhlehni zan khan tun season-a an match lina an khel a, an mikhualna ramah Delhi Dynamos nen goal khung loin an inhnehtawk.
Tun season ISL-a goal luh lohna inkhel hmasa berah hian Chennaiyin tan season hmasa an champion nana player thawhhlawk Jeje Lalpekhlua chu a vawi hnih nan bench-ah dah a ni.
Hnahthial tlangval hi hun tawp nan minute hnih chauh a awm tawh tihah tlan luhtir ni mah se danglamna thlen turin hunin a daih tawh lo a, goal a keng tel lo.
South Indian club tan Jerry Lalrinzuala leh Isaac Vanmalsawma ten inkhel bul an ṭan a, Hnahthial tlangal Isaac hi Emerging Player of the Match-ah an thlang.
Delhi Dynamos tan Lallianzuala Chhangte chuan inkhel bul a ṭan a, Andrija Kaluderovic tana a ball siamsak ṭha zet chu Serbian striker hian goal-ah chantir thei lo mah se Lunglei tlangval hi Winning Pass of the match chawimawina pek a ni.
Hun rei tak hliam vanga a chawlh hnuin Daniel Lalhlimpuia pawh khelmualah a inlan ve leh ta a, Delhi Dynamos striker hi minute 77-naah luhtir niin ngai a awh chho zel.
Zaninah inkhel pakhat a awm dawn a, match thum an khelh tawha la tlawm lo NorthEast United chuan dar 7:30 hian Jamshedpur FC an mikhual dawn a ni.