Arsenal leh Chelsea inlan hun a thleng

"Ningani zana inkhelh a, kar tawpa match a awm leh chuan player an chauin inkhelh a harsa ṭhin," tiin Chelsea manager Maurizio Sarri-a'n a sawi tawh a, Italian manager thu sawi hi Arsenal enkawltu Unai Emery pawhin a ṭawmpui hle.

Zanin hian Europa League group stage khelh chhunzawm a ni leh dawn a, Premier League champion tum pahnih Arsenal leh Chelsea te inlan hun a ni. Dar 12:30 hian Stamford Bridge-ah Blues hian BATE an mikhual dawn a; 10:25-ah Arsenal chu Sporting CP mualah an lenglut thung ang.

Portugal lamah

Europa League match an khelh hmasak pahnihah Arsenal tan harsatna a awm lo a, Vorskla Poltava (4-2) leh Qarabag (3-0) te an sawp - German club Bayer Leverkusen nen goal khung hnem ber (7 goals) an ni mek. Tun ṭuma an khingpui tur Portuguese club erawh a hma ami pahnih ai chuan an harsa zawk tura ngaih a ni.

Arsenal manager Emery-a'n a player a siksawi deuh reng a, zaninah pawh Premier League lama chhawr rim loh zawk te tan hmun a awm tura ngaih a ni. Player ṭha khek an ngai a, chutih rualin group match hnuhnung lama hahdam taka awm thei tur chuan hnehna chan a pawimawh; Portugal-ah thluak hman a ngai dawn.

North London club-in Portu­gal an tlawh hnuhnun ber ṭum 2006 Champions League-ah khan Braga lakah 2-0 in an tlawm a, fimkhur a finthlak ang. Sporting nen hian 1969 daih tawh khan Inter-Cities Fairs Cup second round-ah intawng tawhin Gunners lamin 3-0 in hnehna an chang; thawnthu hlui ziah thar leh chu an thil tum tur a ni.

Gunners khingpui tur Spor­ting hian nipui lai khan buaina an tawk, May thla khan fans

ṭhenkhat chuan an team training nei lai an bei chiam a; he thil thleng avang hian player 11 ngawtin an contract neih lai ti tawpin an chhuak. Gelson Martins, William Carvalho, Bruno Fernandes, Rui Patricio leh Bas Dos te chu chhuak zinga langsar an ni.

Team enkawltu lam pawh an thlang fuh chuang lo. Jorge Jesus thlak nan Sinisia Mihajlovic lalut mah se, AC Milan manager hlui hian ni kua bak hna a thawk hman lo tihin thuneitu lam inthlak boruak chhehvelah ban a ni zui nghal. Season 13 liam tawh hnua an manager ni ṭhin Jose Peseiro kaihhruaina hnuaiah indin thar leh an tum mek.

Sporting hian Arsenal ang thoin Europa League-ah hian match hnih an khelh tawhah point ruk an hmu thei a, an pahnih inkhel result hian an group hmahruaitu dinhmun a hril theih dawn avangin a pawimawh dawn.

London lamah

England khawpui London club ṭha zinga pakhat zawk Arsenal an zin chhuah a ngai a, hetihlai hian Chelsea erawhin anmahni khelmualah mikhual an thleng thei dawn thung. Sarri naute hian harsa lutuk loin Greek club BATE lakah hnehna an chang thei tura ngaih a ni.

Napoli manager hlui Sarri hian, "Italy-ah kha chuan Ningani zana kan inkhelh hi chuan kar tawpa league match kan neih tur hi Thawhṭanni zanah sawn chang a awm," tiin Europa League leh league pangngai khelh kawp a harsat thu a sawi tawh.

Inrinni zan khan Blues hi Manchester United nen an inhnehtawk a, Pathianni zanah Burnley nen an inkhel zui leh ang. Sarri chuan, "A theih chuan group match hnuhnung khelh hmain knock out stage luh theih kan duh," a ti. BATE laka hnehna chang thei tur team a remkhawm ngei ang.

Chelsea hian an group match hmasa pahniha PAOK leh Vidi an hneh ṭumin goal hnih chiah an la khung a, an lamah a la lut lo thung. Zanin hian hliam tenau neih vangin Eden Hazard hmel kan hmuh a rinawm loh, Belgium international a awm loh chuan Ross Barkley leh Mateo Kovavic te chungah mawh­phurhna a sang zual dawn.

Man United laka inkhel bul ṭantu striker Alvaro Morata-a'n beisei a phak lo a, a elpui Olivier Giroud a luh hnuah pawh United tlarhnung an ṭhiat thei chuang lo. Spain leh France international pahnih hian beisei angin season an la hmang lo a, league leh Europa lamah an inkhelh chhawk ṭhin avangin a lut tur zawk pawh rin thiam a harsa hle.

Arsenal tana a khelh laiin Giroud-a'n BATE lakah goal hnih a khung tawh a, ani hi a inlan a nih chuan Greek club lamin an ven uluk a ngai ang. An match hmasa pahnih thlir chuan Sarri-a'n squad a siam chhah thei viau a, tawnhriat ngah Cesc Fabregas leh kum 22 mi Ruben Loftus-Cheek te pawhin BATE an hmachhawn tura ngaih a ni.