BCA-in Bethlehem lakah champion zia chhuah

Mizoram Super League Season 5 match hmasa berah champion lai Zarkawt BCA chuan kai thar BC Bethlehem 80-66 in an hneh. Match hmasa berah Hawla Indoor Stadium mawi tham mipui an pungkhawm a, inkhel hmuhnawm en tur a awm nghal bawk.

BC Bethlehem-in state pawn player Arvind-a hoin bul an ṭan ṭha a, hmahruaitu zawkah ṭang chho mah se an la patuai deuhna a lang. First quarter tawp meuh chuan BCA-in 18-16 in hma an hruai leh tawh a, halftime-ah 40-28 niin chak zawk tur a rin theih a, a tawp thlengin inum mah se champion laiin harsatna hranpa an nei lo.

Zarkawt BCA-in an foreig-ner Cameron Anderson an la chah thleng lo a, amaherawhchu Sowkin Shetty hoin an inlan tawh a, MSL club thar laka an chakna chhan tak erawh Mizo player an neih ṭhat zawk vang a ni.

Season liam ta MVP Lalrina Renthlei chuan point 28 a nei a, BC Bethlehem-in dan ngaihna an hre lo. MSL Club tharin Arvind (25 pts) leh Brian (9 pts) te kawl mah se team angin an la ṭha rual lo a, thin thi thlapin basket an la attempt thei lo a, ho lam tak takin turn over an nei bawk. BCB Mizo player zingah Samuel Malsawmkima'n point 12 neiin point a ngah ber a, amaherawhchu team chakpui tur chuan insiamṭhatna tur a la ngah hle.