Real leh Bayern an chak Lopetegui leh Kovac an him?

Thawhlehni zan Champions League inkhelah Real Madrid leh Bayern Munich ten harsatna nei loin hnehna an chang a, dinmun derthawnga sawi Julen Lopetegui leh Niko Kovac te an him rih.

Real Madrid hian an mikhual Viktoria Plzen chu 2-1 in an hneh a, Bayern hian an mikhualna ramah AEK Athens chu 2-0 in an hneh thung - league lama result ṭha nei thei lo manager pahnihin Europe-ah result duhawm an nei a, an thaw huai ang.

European champion Real-in group G-ah goal difference-a an ṭhat zawk avangin anmahni ang thoa point ruk nei Roma chunga awmin hma an hruai a, Italian club hian Thawhlehni zan vek khan CSKA Moscow chu 3-0 in an sawp.

Bayern Munich-in match thum khelh tawhah point sarih neiin group E-ah pahnihna an ni a, an chunga awm Ajax chu goal difference-ah chiah an phak lo. Dutch club hian Thawhlehni zan inkhelah an mikhual Benfica chu 1-0 in an hneh.

Lopetegui a him?

Real-in Thawhlehni zana Champions League match an khelh hmain inelna hrang hranga an match hnuhnung pangaah vawi li an tlawm a, an coach Julen Lopetegui dinhmun him loh thu chu media titi tui ber a ni.

Mahse, Lopetegui-a'n Real chhuahsan lam a ngaihtuah loh thu a sawi a, 'insiam

ṭhat' dan ngaihtuaha a rilru a sen thu a sawi - Thawhlehni zanah an insiamṭha ta ngei a, minute 11-naah Karim Benzema chuan goal hmahruai a khung, Champions League-a goal 57-a khungna a ni ta.

Real-in minute 55-naah an goal hnihna an khung chauh a, Marcelo chuan match hnuhnung pahniha a goal hnihna ni turin Gareth Bale-a siamsak chu goal-ah a chantir.

Mikhual team tan Patrik Hrosovsky chuan minute 78-naah an si phurh a sut ṭhen a, goal dang erawh an nei thei tawh lo. Real an chak a, thawven khat chu a 'veng' phawtin a rinawm.

A la tawk lo!

Real-in hnehna an chang ve leh ta a, mahse fan-te lawm erawh a kim thei lo. Czech club Viktoria lakah hnehna an chang ngei a, mahse goal an chhuah mai bakah Milan Petrzela leh David Limbersky te hun ṭha neih kha goal ngat se Real hi mualpho thei an ni.

Santiago Bernabeu-ah fan-ten player leh coach an au el a, Spanish chanchinbu lian Marca chuan, "A la tawk zo lo" tiin headline an ziak kulh a, AS chuan, "Hahdamna tham a la ni lo," tiin Real chak dan chu lawmna chi-ah a ruat lo.

Thawhlehni zana Viktoria Plzen an hmachhawn hma hian Spanish media-te chuan Julen hi a 'thu' a ban a nih tawh thu an sawi a, an hmabaka awm hi Barcelona an ni - El Clasico-ah Real a kaihruai hman dawn lo niin an sawi.

Real boss Julen Lopetegui chuan, "Barcelona-a Real ka hruai dawn leh dawn loh hi ka chhan tur a ni lo. El Clasico khel turin uluk takin kan inbuatsaih ang a, hnehna chan ngei tumin kan kal ang," a ti.

Bayern an chak e

German champion Bayern Munich-in an league match hnuhnung pali-a hnehna an chan zawh loh hnuah kartawp khan Wolfsburg an hneh a, Champions League-a 2-0 a AEK Athens an hneh leh tak avangin an thaw huai ang.

Bayern tan hian Javi Martinez chuan scissor-kick hmangin minute 61-naah goal hmahruai a khung a, minute hnih liam hnuah Robert Lewandowski chuan an goal hnihna a khung ve leh bawk.

German champion-in result duhawm an neih loh lai pawhin an coach an thlawp tlat thu an sawi a, mahse Wolfsburg an hneh zawhah khan coach Niko Kovac chuan 'pressure' na tak a neih thu a sawi.

Mahse, pressure sang hnuaiah Kovac a tal chhuak rih niin a lang a, Bayern fan-ten Bundesliga leh Champions League-ah result ṭha neih chhunzawm an beisei ang.

Dzeko a vul leh ta

Roma striker Edin Dzeko-a'n a chet ṭhat a chhunzawm zel a, Real Madrid hneh hlim CSKA Moscow chu an phur vanglai takin 3-0 in an lo sawp - Dzeko chuan goal hnih a khung.

Manchester City striker hlui hian Viktoria lakah hattrick a lo siam tawh bawk a, Champions League-a a match hnuhnung pahnihah goal nga ngawt a khung ta.

Ajax-in Benfica an mikhual zanah point an insem mai dawn niin a lang hman a, mahse injury time-ah Noussair Mazraoui chuan goal awmchhun a rawn khung - Benfica tan chhanletna hun a awm tahw lo.

Dutch club Ajax player kum chawhrual zat hi 23.3 a ni a, tawnhriat an la nei tlem hle - mahse match thum an khelh tawhah an la tlawm lo a, anmahni ringhleltute khelmualah an chhang zel.