Chelsea-ah Alonso a nghet

Marcos Alonso chuan Chelsea tana a rinawm zia lantir nan kum nga daih contract thar ziak a, Spanish defender hian 2013 thleng Stamford Bridge-ah hun a hman chhunzawm dawn a ni.

Kum 27 mi hian 2016 khan Fiorentina aṭangin Chelsea a pan, a tirah player langsar ni lo mah se Antonio Conte hnuaiah a khel ṭha thei hle a, Premier League nomawi an chawi nghal hial. Coach thar Maurizio Sarri a rawn lan hnuah pawh rinrawl a ni chhunzawm, tun season league match vawi kua an khelh tawhah a inlan kim vek.

Blues defender chuan, "Khawvela team ṭha berte zinga mi tan ka khel chhunzawm thei tur hi ka lawm, season hnih chhung nuam takin ka hmang tawh a, hman chhunzawm zel hi ka duh dan a ni," tiin a sawi.

Defender ni mah se Alonso hi goal nawr kawngah pawh a ṭangkai thei hle, London club tan hian inelna hrang hrangah match 92 a khelh aṭangin goal 15 a khung sak a, kumin March thla khan a vawi khan nan Spain chuan ram tana khel turin an ko bawk.

Chelsea director Marina Granovskaia chuan, "Marcos-a contract kan pawtsei thei hi kan lawm hle, tun hnai kan thlir chuan ani hi Chelsea player pawimawh berte zinga mi a ni a, a theihna a san bakah a rilru put hmang a dik em em a ni," a ti.