India Vs Pakistan: Mizo Boxer-te an chak vek

Boxing hmanga India leh Pakistan inbeihnaah 'Hamara Desh' an chungnung a, Indian boxer-ten hnehna an chang vek. Mizo boxer-te an chak nuamsa - NT Lalbiakkima'an a khingpui a knockout a, Laldingliana leh Lalrinsanga Tlau te unanimous decision hmangin an chak.

Golf Club, Dubai-ah hian WBC International Bantamweight title inchuhna a awm a, Philippines boxer Vincent Astrolabio chuan Guillermo Rigondeaux chu uninamous decision-in a hneh a, chutihrualin Cuban boxer El Chacal 'The Jackal' hminglem an pek hi kum 41 mi a ni tawh tih hriat a ṭha.

Mizo an hmuhnawm
Tuipui boxer Laldingliana'n round li chhungin Muhammad Ammar Khan knockout thei lo mah se ṭan phat aṭanga a tawp thlengin a chungnung zawk.

Dinga hian professional fight hmasa pahnihah a khingpui Rohit leh Shubham Chauhan te a knockout thei a, tun ṭuma mi nen fight vawi thum a hmachhawn tawhah a chak vek.

Ring chhungah NT Lalbiakkima a danglam ṭhin a, Fida Muhammad lakah a zuna Mizo mipui an uaina chhan a pholang. Siaha tlangval hi fight vawi li a hmachhawn tawhah knockout vekin a chak.

NT-a leh Fida te hi round khatnaah an inhnehtawk a, round hnihnaah pawh intum tawk viau mah se NT-a'n a kut dinglamin chiang takin a hnek fuh - Fida tan thawhchhuah ngaihna a awm tawh lo.

Khawhruhlian tlangval Lalrinsanga Tlau-in Muhammad Sikandar Abbasi lakah a thiam thil a pholang a, Mizo tlangval hian round ruk chhungin a chhaih kual nasa a, a hnek fuh tam zawk bawk. Sangtea hi a phu ang ngeiin unanimous decision hmanga chaktir a ni.

Grassroots an lawm
Mizo boxer pathum bakah Indian boxer inlan Shaikhom Rebaldo leh Faizan Anwar ten an khingpui Mukhtiar Ahmed Kakar leh Yameen Khan te an hneh. India leh Pakistan inhnek bikah Indian boxer panga an chak vek tihna a ni.

Grassroots Boxing dintu Mujtaba Kamal chuan, "Mizo boxer-te fight danah ka lawm a, Mizo boxing chawisan zel pawh min tiphur. Indian boxer-te an chet ṭhat vangin an chak a, ka lawmna chu an khingpuite pawh an ṭha. NT-a pawh a mit bul a kak a, a khingpui a khirh tih a hriat a, a danglam bik vang chauhin a chak a ni," tiin Vanglaini a hrilh.

A pawi
Mizo mipui hmuh châk JohnKenty Vanlalhlimpuia chu a inlan thei lo a, Tuipui tlangval chuan, "Mizo mipuite fight ka hmuhtir leh theih loh che u avangin inhriatthiamna ka rawn dil. Next fight-ah tel theih ngei ka tum e," tiin a sawi.

JohnKenty tel theih loh chhan hi a hnathawhna Navy lamin international fight a nih avanga an remtih loh vang a ni. Inelna buatsaihtu Grassroots Boxing chuan theihtawp an chhuah thu leh, John Kenty tel thei lo chu pawi an tih thu an sawi ve bawk.

Engtin zel?
Professional Boxing-ah hian hlawh siam lawk a ni ṭhin a, an chak emaw chak loh emaw vangin a danglam lo tlangpui. Tun ṭumah pawh hian Mizo boxer-te hlawh hi tihchian sa vek a ni.

Sangtea hian dollar 3,100 (Rs 2,31,802.50) a hlawh a, PPV aṭangin 8% a chang dawn. NT-a hian dollar 3,000 (Rs 2,24,325) a hlawh dawn a, PPV aṭangin 7% a chang ang. Dinga hian dollar 1000 (Rs 74,775) a hlawh dawn a, PPV aṭangin 2% a chang bawk ang.

PPV aṭanga an chan tur hi Zonet kaltlanga inhnek entu an tam danin a hril ang.