Man City an vannei

Manchester City chuan Inrinni zan khan minute 82-a Phil Foden-a goal hmangin Everton an hneh hram. Goodison Park-a inkhelah box chhungah City midfielder Rodri-a'n a kutin ball a khawih a, penalty pe duh lotu referee Paul Tierney chu inkhelh banah mipuiin an au el.

Toffees hi Frank Lampard hnuaia league match vawi thumah vawi hnih an chak loh avangin Man City lakah goal venhim tumin ṭan an khawh a, keeper Jordan Pickford a che ṭha. England keeper hian Kevin de Bruyne leh Bernardo Silva te goal khung tur ṭha takin a dang.

Lampard hoten hun rei zawk Man City buaina thlen mah se minute riat chiah a awm tawh tihin Michael Keane chetsual vangin Foden-a'n a khung.

Goal luh hnuah City midfielder Rodri-a'n anmahni box chhungah ball lak thlak a tum a, a kut hmangin a la thla. VAR hmanga ennawn ni mah se referee Paul Tierney-a'n penalty a pe lo. Thil thleng hnai taka hmutu Gwladys Street End-a Toffees ṭantuten mak an ti hle.

Lampard chuan, "A chiang em em a, penalty a nihzia kha sawisel bo a ni. Ka fanu kum thum mi pawhin penalty a nihzia a hria ang. Mahni hna thiam lo professional an awm avangin point kan hloh. Offside a awm loh avangin penalty a ni a, thutlukna siam turin second nga pawh a ngai lo," tiin a lungawi lo a, Everton fan-ten point an hloh avanga an ui tluk zetin Liverpool ṭantuten pawi an ti ang.

Pep Guardiola hoten point thum hlu tak an hmuh avangin point 66 an hmu a, anmahni hnaih bertu Reds aiin point rukin an hmu tam zawk. Jurgen Klopp-a hoten nizan khan League Cup final an khel a, March 5, Inrinni hian West Ham an hmachhawn ang.