Christian Eriksen a inkhel leh ta

Euro 2020-ah lungphu chawl vangin khelmual chhungah Christian Eriksen a tlu a, Danish midfielder hian ni 259 hnuah competitive match a khel - infiamna khawvel tan chanchin lawmawm a tling.

Inrinni zan khan Brentford-in Newcastle United an mikhual a, Magpies-in 2-0 in hnehna an chang. Inkhel result aiin Eriksen-a chanchin hian ngaihven zui a hlawh a, Tottenham Hotspur leh Inter Milan midfielder hlui hian minute 52-naah a hnampui Mathias Jensen a thlak.

Nikum June thlaa Denmark leh Finland inkhelh ṭumah Eriksen hi minute nga chhung a lungphu a chawl hman a, thi thei dinhmunah a ding. Hemi ṭuma thlaktu chu tun ṭuma a thlak Jensen tho hi a ni. Brentford ṭantuten Erisken-a'n warm up a neih aṭanga coach Thomas Frank hnen aṭanga a khelh dan tur thupek a dawn thlengin thawm ring tak an chhuah.

Kum 30 mi Eriksen chuan, "Result dah ṭha ta ila, pa hlim tak ka ni. Ka hun tawnte thlir kir ila, ka inkhel leh thei hi ka lawm hle. Brentford hian min duhsak a, ni khatna aṭangin nuam ka ti hle. Ka chhungte, ka nu leh pa, ka fanaute, ka pizawn te bakah ka doctor te thlengin min ṭawiawm. Ka chhungte tawn tur kha ka tawn ai mahin a harsa ang," tiin a sawi.

Minute 11-na lekah Bees player Josh Dasilva chu hnawhchhuah a ni a, Eriksen-a'n khelmual a luh hian Newcastle-in 2-0 in hma an hruai tawh. First half-ah Joelinton (33') leh Joe Willock (44') ten an khung. Magpies-in hnehna an chan avangin 25 points an hmu a, 14-naah an awm tawh avangin relegate lo turin an dinhmun a ṭha a, top 10 an beisei ṭan ang.