Goal khung dan thiam lo Man United

Manchester United chuan Inrinni zan khan Watford an mikhual a, Old Trafford-ah goal an khung theih loh avangin relegation zone-a awm Hornets nen goal awm loin an inhnehtawk. Man United hi palinaah la awm chhunzawm mah se an hnuaia awm Arsenal aiin match thumin an khel tam zawk a, an inthlauhna erawh point hnih chauh a ni.

Chance inhlah siak
Man United-in team ṭha zawk an ni tih an lantir nghal a, Cristiano Ronaldo-a'n ṭan phatah goal ban a pet per. Anthony Elanga leh Ronaldo ten mawi zeta Watford tlarhnung an ṭhiah hnuah Bruno Fernandes-a ball pet keeper Ben Forster-a'n a dang. Fernandes hian Ronaldo pe se chuan Man United jersey no. 7 hian goal ruakah a khung thei ang.

Mualneitu an vanduai a, Ronaldo hian Fernandes-a siamsak chu khung zui mah se offside vangin pawm a ni lo. Fernandes hian Pogba cross a tlawh goal thei lo a, Ronaldo cross pawh goal zawnah a tauh thei chuang lo.

Man United-in player ṭha rual an kawl a, Watford lakah erawh goal khung thiam vanga football khawvela hming chher tawhte pawhin goal khung dan an theihnghilh emaw, tih mai tur a ni. Rawlthar duhawm Elanga pawhin second half-ah chance ṭha bik a hlah a, veteran forward Ronaldo pawh goal hmaah a vannei bik lo.

Hriam tawk lo
Manchester United manager lailawk Ralf Rangnick chuan, "Goal khung tih loh chu kan tidik vek e. Goal hmaah tun aiin kan hriam a ngai. Goal ban pet per chu vanduai vang a ni a, chutihrualin keeper chauh hmachhawn hnua khung loh fo kha chu hriam tawk loh vang a ni. Result pawm har tak a ni," tiin chak an phu thu a sawi.

German manager Rangnick hian defence laiah Victor Lindelof leh Raphael Varane te a inkawptir a, captain Harry Maguire bench-ah ṭhu tluan mah se goal an chhuah lo. Man United hian March 6, Pathianni zan dar 10:00 hian Etihad Stadium-ah Manchester City an hmachhawn ang.