Ricky-a'n Jamshedpur a chakpui
Zirtawpni zan khan Indian Super League inkhelah Jamshedpur FC chuan 3-2 in NorthEast United an hneh a, JFC defender Ricky Lallawmawma chu hero of the match-ah thlan a ni.
Mizo tlangval R. Laldanmawia'n Highlander tan goal khung mah se a team a chhanhim zo lo a, Seiminlen Doungel, Greg Stewart leh Jordan Murray ten JFC tan goal an khung.
Inrinni zan ISL-ah inkhel pahnih a awm a, Kerala Blasters chuan 3-0 a Chennaiyin an sawp laiin Mumbai City chuan 2-0 in FC Goa an hneh bawk - semifinal inchuh boruak a sang zel.
Sialhawk Express
Jamshedpur-in Seiminlen Doungel leh Greg Stewart hmangin goal an khung hmasa a, 2-0 a ni. Men of Steel hi awlsam taka chak tura ngaih an nih laiin Danmawia a rawn inlar a, minute 66-naah si phurh a sut ṭhen.
Sialhawk Express goal khung hnuah Marcelinho chuan Highlander tan a khung ve leh a, 2-2 a ni der - mahse, hun tawp nan minute ruk chiah a awm tawh tihah Jordan chuan a khung ve leh a, 3-2 in Jamshedpur an chak.
Danmawia'n match hnih a zawnin goal a khung ta a, tun season ISL-a match 12 a khelh aṭanga goal li khungin assist vawi khat a nei a, tun season-a Indian forward langsar pawl a ni phak - Highlander tan Danmawia hi bench aṭanga luhtir a ni a, Lalkhawpuimawia pawh bench aṭanga luhtir a ni a, Joe Zoherliana'n bul a ṭan thung.
A hming Ricky
Durtlang tlangval Ricky-a'n tun season ISL match 17 an khelh tawhah Jamshedpur tan a la khel kim vek a, Bolton Wanderers boss hlui Owen Coyle-a'n Mizo tlangval chungah rinna a nghat lian hle - amah ang thoin Laldinliana Renthlei chuan match 17 a khel kim vek bawk.
Ricky chuan, "ISL-a hero of the match ka nih vawi khatna a ni a, defender tan chuan mimal chawimawina dawn hi thil har tak a nih bawk avangin ka ngai hlu hle. Coach-in ka chungah rinna a nghat ve tlat a, keipawhin nuam ka ti a ni," tiin Vanglaini a hrilh.
Mizoram Premier League chhul chhuak defender chuan, "Season ṭantirah kha chuan champion em ka beisei ngam lo. Mahse, tunah chuan kan dinhmun pawh a zia ta viau a, champion beiseina pawh a sang ve ta," a ti - hmahruai tu Hyderabad aiin point khat chiahin an hniam a, match khatin an khel tlem bawk.
Blasters & Mumbai
Kerala Blasters-in semifinal khelh an beisei ve zel a, Chennaiyin chu 3-0 ngawtin an sawp. Blasters tan Jorge Diaz chuan goal hnih a khung a, Adrian Luna chuan goal khat a khung bawk.
Blasters tan K. Lalṭhathanga a khel tluan a, Chennaiyin lamah Jerry Lalrinzuala chu hun tawp thleng a inlan bawk. Hetihlai hian Inrinni zan inkhel dangah Mumbai City chuan 2-0 in FC Goa an hneh.
Mumbai tan Mehtab Singh leh Diego Mauricio ten goal khat ve ve an khung a, Goan club-in a chhanletna tur an nei lo - Mumbai tan Lalengmawia leh Lallianzuala Chhangte ten bul an ṭan a, Lianzuala tauh luh tura langa Goa goalkeeper Naveen Kumar-a'n a dan chu uiawm tak a tling.