Poland-in Russia khelhpui duh lo!

Russia-in Ukraine a run avangin infiamna khawvel pawhin Russia a hnuchhawn zel a, Poland chuan World Cup playoff semifinal-a Russia nena an inkhel tur chu inkhelh lo turin thutlukna an siam - ruahman dan chuan ram pahnih hi March 24-a intawng tur an ni a, playoff hi two-legged a khelh tur a ni lo.

UEFA-in World Cup-ah hmun 13 an nei a, team 10 tling tawhin hmun ruak pathum dang chu playoff hmangin a hnawh khat tur zawn a ni dawn. Poland hi Path B-ah awmin Russia nen semifinal-ah an intawng dawn a, an chak chuan playoff final khel tur an ni.

Mahse, Polish Football Association president Cezary Kulesza chuan Russia nena an inkhel tur chu khelh tumna an neih loh thu a sawi a, Poland captain Robert Lewandowski chuan, "Thutlukna dik a ni. Ukraine-a tharum thawhna a thlen mek laia Russia nena lo inkhelh hi suangtuah chi pawh a ni lo.

"Russian footballer leh fan ten thiam lohna an nei lo a, mahse, engmah thleng lo ang maia awm erawh ka thei lo a ni," tiin a sawi a, an ram FA thutlukna chu a pawm thu a sawi.

Polish FA president Cezary Kulesza chuan, "Thusawi ngawt a hun tawh lo a, a taka chet chhuah a hun tawh a ni," a ti a, Poland hian Sweden leh Czech Republic te nen thuchhuah inṭawm siamin Russia-ah playoff khelh loh ni se an lo ti tawh.

Mahse, Poland-in Russia an inkhelhpui loh tur thu an sawi hnuah Sweden pawhin playoff chu khawiah pawh khelh ni dawn se, Russia an hmachhawn loh tur thu an sawi ve bawk.

Poland leh Russia awmna Path B, semifinal lehlamah Sweden hi Czech Republic nen an inkhel dawn a, he inkhela chak zawk hian Poland leh Russia inkhela chak zawk chu playoff final-ah an hmachhawn dawn a ni.

Swedish FA chuan Russia telna playoff chu thaibo mai turin FIFA an ngen bawk a, FIFA chuan Russia-in Ukraine an run avanga football khawvela a thil nghawngte chu uluk taka an thlithlai tur thu Ningani khan an lo sawi tawh.

Hetihlai hian Scottish FA chuan Ukraine nena World Cup playoff semifinal an khelh tur chungchangah UEFA chu inbiakna an neihpui mek a, April-a Kyiv khawpa Women's World Cup qualifier khelh tura ruahman pawh an sawipui.