Dan theih loh Rafael Nadal

Rafael Nadal chuan season duhawm a hman a chhawmnung a, kumina a nomawi pahnihna ni turin Mexican Open title a la - Spanish tlangval hian January thla khan Australian Open nomawi a lo chawi tawh bawk.

Nimin final inkhel hmuhnawmah Nadal a chungnung hle, a khingpui Cameron Norrie chu 6-4, 6-4 in a hneh. British number 1 Norries tan Nadal kaltluang lai hi dan chi a ni lo, set pahnihah a service a hum thei lo ve ve a ni.

Nadal hi season hmasa khan hliam vangin a buai a, nikum tawp lamah phei kha chuan tennis chawlhsan a ngaihtuah hman hial. Mahse, kuminah ropui takin a lo kir, season kal laiah match 15 a khelh tawhah a la chak vek.

Tennis season bul a ṭan fuh ber ṭum tawngtu Nadal chuan, "Kumin tirah kha chuan tuna ka thil tawn ang hi suangtuah ngam a ni lo, hun rei vak lo liam taah kha chuan rilru lungngai takin ka awm, tunah erawh beisei phak bak a ni," a ti.

Spanish star hian tennis a khelh hun chhungin nomawi 91 a chawi tling ta chiah. Mexican Open bikah hian champion thei naupang leh upa ber record a siam, 2005 khan kum 18 mi niin a champion a, tunah kum 35 mi niin a champion leh chiah.

Kum 35 mi Nadal hian Australian Open final-a a hneh Daniil Medvedev kha tun ṭumah pawh semifinal-ah a hneh leh a, world number 1 thar tur Medvedev hian a ngam lo rih hle - set hloh miah loin Nadal hi a champion.

Final-a chak lo Norrie hi tun hnaiah match riat chhung chak zawn thei a ni, world number 12 chuan, "Rafa chuan hun remchang min siamsak eih lo, tih sual zeuhah erawh na takin min hrem let nghal, dan theih a ni lo," tiin a khingpui chungchang a sawi.

Nomawi chawi hnem lamah Nadal hian - Jimmy Connors (109 titles), Roger Federer (103) leh Ivan Lendl (94) te chauh phak loh a nei, harsatna lian tak a nei leh a nih loh chuan kuminah pawh title dang a lak belh leh ngei chu a rinawm.