Bielsa leh Leeds United inṭhen

Leeds United leh an manager Marcelo Bielsa chu nimin tlai khan an inṭhen fel, an manager hi ngaihluin ngaisang em em mah se tun hnaia an khelh chhiat em avangin an inṭhen a ngai ta a ni.

Kum 66 mi Bielsa hian 2018 June aṭang khan Leeds hi a enkawl ṭan, kum 16 hnuah English football inelna sang ber Premier League-ah a kai pui. Season hmasa khan pakuana an ni a, tunah erawh relegation zone aṭangin point hnih chauhin an him hram.

Leeds United chairman Andrea Radrizzani chuan, "Leeds United tana thutlukna ka siam tawh zinga harsa ber a ni. Marcelo ho hian hun hlimawm kan hmang a, club kalphung tam tak a siamṭha. Mahse, tun hnai kan result hian kan duh leh beisei a phak lo," tiin an manager an ban thu a sawi.

Inrinni zan Elland Road-a Premier League inkhelah Leeds hian an mikhual Tottenham Hotspur chu 4-0 in an ngam lo. Spurs tan hian Matt Doherty, Dejan Kulusevski, Harry Kane leh Son Heung-Min ten goal khat ṭheuh an khung.

Mangṭha Bielsa
Marcelo Bielsa hian football khelh duh dan phung a nei a, chu chu attacking game a ni. Argentine manager hian football hmuhnawm chu a pho chhuak ṭhin ngei mai, mahse an player neihin an zir loh bakah tlarhnung a ngaihtuah tawk lo.

February thla chhunga an league match khelhah goal an chhuah hneh. Match nga khelin goal 20 tehmeuh an chhuah, chawhrualin match khata goal li chhuah ziah ang an ni, season kal laiah EPL team zinga goal chhuah hnem ber (60 goals) an ni mek.

Championship aṭanga ropui taka Premier League kai puitu chungah Leeds ṭantuten rilru zau tak an nei. Mahse, an boruak ṭha lo aṭanga tal chhuah an duh a, mawhphurtu manager chungah thutlukna harsa an siam a ngaih phah.

Tun hnaiah Leeds hmachhawn zingah - Man United, Liverpool leh Spurs an tel a, an player pawimawh Kalvin Phillips leh Patrick Bamford te an chhawr theih loh lai a nih avangin a harsa ve bawk.

Spurs an harh
Ropui taka Manchester City an hneh hnuah lawkah Burnley an ngam lo a, manager Antonio Conte a lungawi lo a ṭawng chhuak nasa hle. Bang mai tura rin a ni hman, mahse chairman Daniel Levy thlawpna a dawng ṭha tawk.

League match an khelh hnuhnung pangaa vawi li tlawm chungin Leeds an hmachhawn, tun ṭumah erawh a tir aṭanga a tawp thlengin an chungnung; pasarihna ni mah se Champions League khelh an la beisei ngam ang.

Kane leh Son inkawp fuh hi lawmna tham a ni, anni pahnih inkawp hian Premier League goal an thawh chhuah dun chu goal 37 a ni tawh a, anni aia thawk chhuak hnem an awm lo - Frank Lampard leh Didier Drogba te inkawp an khum.

Conte naute hian March thla chhungin league bikah Everton, Manchester United, Brighton leh West Ham te an hmachhawn dawn, thla thara an chet dan hian Italian manager awm zel dan tur pawh a hril tura ngaih a ni.