Abramovich-a'n midang kutah Chelsea dah

Chelsea neitu Roman Abramovich chuan a club enkawl hna chu Chelsea charitable foundation trustee-te kutah a hlan thu a sawi a, club neitu la ni reng mah se Blues-ah thutlukna siamtu a ni rih dawn lo tihna a ni.

Russia chuan tun hnaiah Ukraine ram luhchilhin, sipai chakna hmangin a bei a, hemi avang hian Ukraine thlawptu UK sorkar chuan Russian sumdawng hausa Abramovich hi hrek a tum nia sawi thawm a awm.

UK sorkar hian a duh chuan Russia president Vladimir Putin ṭhianṭha Abramovich hi an ram chhunga sumdawnna leh thil dang engmawh nei loin a siam thei a, chu chu Abramovich hian hre ranin UK sorkar a chet khalh ta ni berin a lang.

Kar hmasa khan UK MP Chris Bryant chuan Home Office document put ru, UK-a Abramovich awm loh theihna dan chu a hmu niin a sawi a, UK sorkar chu Russian sumdawng hausa chu an rama che thei loa siam turin a ngen bawk.

Abramovich chuan, "Club tana ṭha ber tur ngaihtuah chungin thutlukna ka siam fo ṭhin a, chu chu tunah pawh hian ka la dinpui reng. Hei vang hian Chelsea enkawl hna chu Chelsea charitable foundation kutah ka hlan a, tun dinhmunah chuan club, player, staff leh fan te kaihruai turin an ṭha ber a ni," a ti.

Chelsea charitable foundation-a trustee-te hi US dan hremi leh club chairman ni bawk Bruce Buck, Chelsea women's team manager Emma Hayes, director of finance Paul Ramos, British Olympic Association chair Sir Hugh Robertson, Fare (Football Against Racism in Europe) chief Piara Powar leh dan hremi John Devine te an ni.

Abramovich hian Chelsea hralh tumna erawh a la nei lo nia sawi a ni a, a club sum a puk tir, pound tluklehdingawn 1.5 pawh lak let a tum nia sawi awm mah se hei pawh thudik tawk lo a ni.

Kum 55 mi Abramovich chuan, "Kum 20 dawn Chelsea neitu ka nih chhungin vawiina kan hlawhtlinna zawng zawng kan chan theih nan te, naktuk atana club ruahman chung leh khawtlang tana thil ṭha ti chungin hna ka thawk vein ka inhria a, club venghimtu angah ka inngai a ni," a ti.

Abramovich hnuaiah Chelsea hian Champions League (2), Premier League (5), FA Cup (5), Europa League (2), League Cup (3), UEFA Super Cup (1) leh Club World Cup (1) nomawi te an chawi.

Chelsea Supporters' Trust chuan Abramovich-a thuchhuah chu sawi chiang lehzual turin club an ngen a, mahse, he thu buatsaih thleng hi chuan Blues-in an chhanna thu hriat tur a awm rih lo.