Real Madrid chhandamtu Karim Benzema

La Liga-ah hmahruaitu an la danglam lawk dawn lo - Real Madrid chuan Inrinni zan khan khualmualah Rayo Vallecano chu 1-0 in an hneh a, hma an hruai chhunzawm zel.

Carlo Ancelotti enkawl team hian hnehna chang tur erawhin vanneihna an mamawh tel a, draw result-ah lungawi an zir mai a ṭul dawn emaw tih laiin Karim Benzema chuan minute 83-naah chakna goal a khung.

Real hian anmahni hnaih bertu Sevilla aia match khata khel tamin, point kuain an sang fal ta a, nizan khan Sevilla hian Real Betis an lenchilh a, result kan hre hman lo - he thuziak i chhiar meuh chuan an inthlauhna hi a danglam leh tawh mai thei.

Hetihlai hian Atletico Madrid pawhin season tharah Champions League khelh ngei an duh tih an pholang ve leh ta a, an mikhual Celta Vigo chu Inrinni zan inkhel dangah 2-0 in an hneh - Renan Lodi chuan goal hnih an khung.

Zidane-a fapa
Real Madrid player ropui ni ṭhin, an coach hlawhtling ber pawl ni zui ta Zinedine Zidane-a fapa Luca Zidane chu Rayo Vallecano keeper a ni a, Real Madrid youth system chhuak ni bawk keeper hi a khel ṭha hle.

Kum 23 mi keeper hian Marco Asensio khung ngei tur nia lang chu ṭha zetin a dansak a, a ṭhianten Real keeper Thibaut Courtois an chhaih buai ve reng bawk.

Belgian keeper Courtois hian Oscar Trejo leh Alvaro Garcia khung ngei tur nia lang chu ṭha zetin a dansak ve ve a, Real si ban nghaktu hi 'top class' ni lo se Madrid khaw club hi mualpho thei an ni.

Rayo hian vawi 19 zet shot an nei a, heng zinga panga chu target-ah kal mah se an vanneih zan a ni lo - a bik takin forward Sergi Guardiola vanneih zan a ni lo a, vawi riat zet chu chance a nei!

A tawpah Benzema
Player ṭha bik danglamna chu a hun tea an rah ṭhin hi a ni a, hun harsa aṭangin an team an khai chhuak ṭhin - chutiang mi chu Benzema a ni a, French striker an neih avangin Real an lawm tulh tulh ang.

Benzema hian minute 83-naah inkhela goal awmchhun a khung a, Vinicius Jr nen mawi taka ball an inpek kual hnuah kum 34 mi striker hian a hmawr a bawk - hetihrual hian mahni hmasial lo taka goal khung tur siamsaktu Vinicius fak loh theih a ni lo.

Season danga goal 10 aia tam la khung ngai lo Vinicius hian tun season-ah match 35 khel tawhin goal 16 a khung der tawh a, assist vawi 11 a nei bawk.

Benzema hian tun season-ah match 31 khelin goal 26 a khung tawh bawk a, assist vawi 11 a nei bawk - kum 34 mi ni tawh striker sulhnu atan chuan ropui tak a ni.

Atletico an chak
Levante laka an tlawm hnuah Atletico Madrid an insiamṭha a, league match hnih chhung chu a zawnin an chak ve leh ta - Inrinni zan khan an mikhual Celta Vigo chu 2-0 in an lo hneh.

Diego Simeone enkawl team tan Renan Lodi chuan goal hnih a khung a, Celta lamin a chhanletna tur an nei lo - kum 23 mi Lodi hian Inrinni zan hma hian La Liga match 73-ah goal hnih chiah a khung!

Lodi goal khung hi Geoffrey Kondogbia siamsak ve ve a ni a, Atletico tan top four-a season kharna chance a sang ve zel - chutihrual chuan tun season league match 26 an khelha vawi sarih tlawm tawh Atletico hi an elpuite result-ah an innghat thung.

Celta Vigo an hneh avangin palina an ni mek a, anmahni hnaih bertu Barcelona aiin match hnihin an khel tam thung. Barca hian point thumin Atletico hi an thlau a, he thuziak i chhiar chuan an inthlauhna erawh a danglam leh tawh ang. Catalan club hian nizan khan Athletic Bilbao an mikhual a, he thu buatsaih a nih lai hian result kan hre hman lo.