Ibrahimovic nihrualtu Mbappe

Kylian Mbappe-a goal hnih hmangin Paris St-Germain chuan tlak hlau zinga mi Saint-Etienne 3-1 in an hneh a, season hmasa lama an lak loh Ligue 1 nomawi la turin an dinhmun an sawhnghet ta hle.

France international Mbappe hian Paris club tan goal 156 a khung tling ta chiah, club tana goal khung hnem pahnihna Zlatan Ibrahimovic a nih rual. An chungah hian goal 200 khungtu Edinson Cavani a la awm.

Mbappe goal pahnih hi Lionel Messi siamsak a ni a, goal khungtu ni lo mah se league season kal laia assist vawi 10 nei tawhtu Messi thiamna thup theih a la ni lo - an goal thumna hi Danilo khung a ni thung.

Kum 23 mi Mbappe hian PSG tan season nga chauh a la khel a, khel chhunzawm zel chu ni se club tana goal khung hnem ber record hi a siam ngei ang tih a sawi ngam. Mahse, tun season tawp rualin a contract neih lai a zo dawn, a hma hun a chiang lo mek.

Mbappe chuan, "Match hnuhnunga Nantes kan hmachhawn ṭum ang tho khan goal kan chhuah hma, a nihna takah chuan an chiai lek lek. Mahse rei vak lo hnuah kan nihna tak kan lantir theih avangin a lawmawm.

"Goal 156 khungin Ibrahimovic ka nihrual, player ropui sulhnu han nihrual ve chu a lawmawmin a hlu hle. A bik takin kan khelmual Parc des Princes-ah ngei mai goal khung hi chu a nuam zual," tiin a sawi.

Mauricio Pochettino naute hian match 26 aṭangin point 62 an hmu a, pahnihna Nice nen khelh zat inanga an inthlauhna chu point 16 zet a nih tawh avangin an champion tluk a ni tawh. March 6-ah Nice mualah hian an lenglut ang.