Juventus mamawh chhanna Vlahovic

Dusan Vlahovic-a'n Juventus a chakpui leh ta. Serbian striker hian Old Lady a pan hnuah an mamawh goal a khung zel a, tunah chuan Massimiliano Allegri naute hian season thara Champions League khelh an tum ngam leh ta.

Inrinni zan Serie A inkhelah Juventus hian Empoli 3-2 in an hneh hram. Mikhual Juve tana Moise Keane goal hmahruai khung chu Szymon Zurkowski-a'n a sut, an tlarhnung tihsual vanga goal hi lut a ni.

Pound maktaduai 58 man Vlahovic-a'n tawih zetin an siphurh a sut a, box chhunga a ball chang chu a chiai eih lo - chawlhlawk laiin 2-1 in hma an hruai. Second half-ah mawi taka keeper chip khumin an goal thumna a khung bawk.

Serbia striker Vlahovic hian January thla khan Fiorentina aṭangin Juventus hi a zawm, a club thar tan hian inelna hrang hrangah match ruk aṭangin goal li a khung der tawh, kum 22 mi chauh a la nih avangin goal dang pawh a la khung belh zel dawn.

Zirtawpni zan khan champion tum pahnih an inlan. Hmahruaitu AC Milan chu Udinese nen 1-1 in an inhnehtawk. Milan tana Rafael Leao goal chu Destiny Udogie hmangin an sut a, point khatah an lungawi a ṭul.

Milan an chak zawh loh avangin Inter tan hun ṭha a ni. Mahse, champion lai hi tlak hlau Genoa nen goal awm loin an inhnehtawk. Nizan khan pathumna Napoli an inlan a, hnehna an chang a nih chuan table hmahruaitu an ni ang.