Chhinga Veng lakah Chanmari vanduai

Mc Dowell's No. 1 Soda Mizoram Premier League Season 7-ah champion lai Chhinga Veng vanneihna a kaltluang a, nimin tlai khan goal awm loin Chanmari FC nen an inhnehtawk.

Chawngthansanga enkawl Chanmari FC-in inkhel an thunun a, striker MC Malsawmzuala goal khung tur ṭhahnem tak dangtu Chhingcows keeper Zothanmawia chu man of the match a thlan a ni.

Attacking Football
Chanmari FC-in champion lai hmachhawn mah se attacking football khelh an ṭhulh lo a, an huaisen zarah an tlarhnung an hahdam a, goal chance pawh an ngah hle.

Chhinga Veng keeper T. Mawia'n Chanmari forward MC-a tauh goal tur ṭha takin a dang a, Siaha tlangval ball pet kawh ṭha tak pawh a dang a, MC-a freekick pet erawh goal zawnah a kal lo

College Veng tlangval T. Mawia'n dan loh chhun Vanlalbiaa Chhangte tauh erawh referee-in a pawm sak lo a, Chanmari tan hriatthiam a harsa ang.

Second half-ah pawh Chanmari bawk an hlauhawm a, MC-a vanneih ni ni se goal thun ngei tur a ni a, Chhinga Veng defender PC Laldinpuia'n goalline aṭangin a clear bawk.

Point khat a tawk
Chhinga Veng coach Lalsang-zuala Hmar chuan inkhelh hmain inhliam an ngah avangin point khatah an lawm tawk thu a sawi a, a duh ang thleng.

Chhingcows-in an foreign striker Gatch Diomande chu second half ṭantirhah an luhtir a, danglamna a thlen lo.

Injury time-ah erawh Chhingcows-in goal an khung a, offside vangin pawm a ni lo a, referee thutlukna sawisel theih a ni lo.

Engtin zel?
Chhinga Vengin hneh loh an la tawng lo a, point 23 hmuh tawhin semifinal thleng hmasa ber an ni.

Chanmari erawhin point 11 an hmu a, palinaa awm Mizoram Police chu point khatin an pha lo. Coach Chawngthansanga chuan, "Kan thawkrim chhunzawm ang a, chak hun a awm mai ang," tiin Vanglaini a hrilh.