March aia ṭha zawk Dijon Najee Farr?

Mizoram Super League season kal tawh thlir kir chuan player malkhaia hmuhnawm ber thlang dawn ila Ronald March buk a rit fal nalh. Mission Veng Vikings assistant coach H. Lalhruaitlunga chuan March-a ai chuan kumina an player thar Dijon Najee Farr chu a ṭhat zawk an beisei thu a sawi!

Zanin dar 8:00 hian Hawla Indoor Stadium-ah MSL 3 champion Vikings leh Zarkawt Serpents ten tun season-a an match hmasa ber an khel dawn a, tualchhung basketball ngaina tan en ngei chi a ni.

Moses awm lohna

Mission Veng tlangval Hruaia chuan, "March ai khan Farr hi a sang hret a, a rit zawk bawk. A thiam em avangin mamawhna hmun apianga chhawr theih a ni, a dam a nih phawt chuan a inlan zel ang," tiin Vanglaini a hrilh.

Vikings hian an captain Moses Zoremmawia chu Khatla TBL lakah an chan thung. Hruaia chuan, "Moses te ang player ṭha kan chan a nih chuan a hmunruak a zau hle, chutih rualin player ṭha dang kan la ve bawk," a ti a, tawnhriat nei ṭha Micheal F. Lalawmpuia leh Laruatkima Sailo an la neih avangin an la inringtawk hi a mak lo.

Hmel thar

Tualchhung basketball inelna sang ber aṭanga an tlak hnuah Zarkawt Serpents an rawn kir leh a, division hniama an awm lai hian ADBBA Cup, I Division League leh Aizawl District champion an ni thei - zaninah hian feet 6 leh 8 inches zeta sang Ravi Bhardwaj hoin an khel thei dawn.

Zarkawt Serpents manager Michael Lalchhuanawma chuan, "Tun hmain MSL khel tawh mah ila kuminah hian hmel thar kan ngah a, mahse kan player lak thar Ravi hian October 22 khan Mizoram a rawn thleng tawh a, training a nei ṭhain kan khelh dan pawh a man chak hle," tiin Vanglaini a hrilh a, champion tawh Vikings a hlau bik lo.

Serpents-in player 15 an ziah luh zingah K. Lalnunkima, Hmingthanmawia, Lalhmangaihzuala bakah LR-a leh KC-a te chiah MSL tawnhriat nei an ni a, coach C. Lalrohlua leh assistant coach Lalhriatthiama ten an naute an remkhawm thiam a pawimawh dawn a ni.