Police hlau lo Chawnpui

Mc Dowell's No. 1 Soda Mizoram Premier League Season 7 a ngaihnawm chho zel a, vawiin tlai dar 3:00-a Chawnpui FC leh Mizoram Police pawh hi a chhungthu hriatin en a châkawm lehzual.

Police hian Serchhip-ah Eric Lalsangzuala leh Malsawmfela te goal hmangin Chawnpui FC 2-0 in an hneh a, amaherawhchu tunah chuan Sawmfela bakah match hnuhnung pahniha man of the match keeper F. Lalmuanawma, best player nilai R. Malsawmtluanga leh player ṭha dang khel thei lo tur an awm nual. Hei vang hian Police hi chak tura ngaih ngawt thei a ni lo.

Chutihrualin Police pawhin an player ṭhenkhat chhawr reng theih loh an awm tih an hriat avangin October thla transfer-ah tawnhriat nei ṭha Joseph Lalnunpuia, Lalhlimpuia (Tat-a) leh Benjamin te an lalut.

Chawnpui pawhin midfielder Lalruatfela (RF-a) damlohna vangin an chhawr thei lo a, amaherawhchu Lalbiaknia a rawn let chiah avangin buaina a awm lo ang.

Police-in match hnuhnung pahnihah hnehna chang mah se tuna an team hi chu result an neih ṭhat loh laia an team nen khan a danglam tam dawn lo a, Chawnpui tan point hmuh theihna remchangah a ngaih theih.

Police coach Lalbiaksanga Colney chuan, "Kan chhawr theih chin player-te pawh hi an la ṭha em em a, Chawnpui hnehna tur squad chu kan la kawl a ni," tiin kim lo mah se an la ṭhat zawk tho thu a sawi.

Chawnpui coach Laldinthara chuan, "Aizawl FC laka point thum kan hlawhchhuah loh chhan kha kan vanduai vang a ni a, kan phu ang result kan la hlawh chhuak lo. Serchhip-a Police nen kan inkhelh pawh khan goal hnih chhuah mah ila ball chang tam zawk kan ni a, tun ṭumah chuan kan vanneih tawh ngei ka beisei," tiin Police ang thoin chak turah a inngai.