Electric Veng harsatna siam tur Ramhlun North?
Ramhlun North-in insiamṭhat tumin semifinal beiseina nen Serchhip an pan a, Electric Veng lakah an chak lo. Mizoram Premier League Season 7 round sarih khelh zawhah Ramhlun North-in point hnih chauh an hmu a, hnual theihna tur ni mah se beisei an nei tlat a, match hnuhnung berah Bethlehem Vengthlang hnehin team nung tak an ni leh tawh.
Zanin dar 7:00 hian Ramhlun North hian an dinhmun tichhetu Electric Veng an hmachhawn dawn a, semifinal an thleng pha ta lo a nih pawhin MPL kaithar tana harsatna siam chu an duhzawng tak a ni ngei ang.
Chak ngai EFC?
Electric Vengin match riat aṭangin point 16 an hmu a, semifinal luh beisei tawh mah se match hnuhnung pathumah point thum chiah an hlawhchhuah avangin an dinhmun hi a him bik lo. Coach Vanlsawma Colney chuan, "Semifinal luh kan duh a nih chu chuan chak ngei ngei a ngai tawh" tiin Vanglaini a hrilh a, a sawi dik chiah.
Chutihrualin EFC hian point thum an hmu lo a nih pawhin point khat an hlawh chhuak a nih chuan an tum ram semifinal hi chu an hnaih hret hret tho ang. Amaherawhchu Ramhlun North hian an foreigner pathum an chhawr thei vek dawn a, tlarhmaah Lalliansanga leh Lalremruata te an chet ṭhat bawk avangin draw game khelh ngam chi a ni lo.
Caoch Sawma chuan, "Notea ven reng a ngai dawn, Remruata a che ṭha em em bawk. Chuvangin fimkhur takin kan khel dawn a, kan ṭanrualna hi kan ṭhatna ber a ni tih kan hriat reng a pawimawh bawk," tiin player leh veng mipuite nen an theihna zawnah ṭheuh ṭan an mamawh thu a sawi.
Phur thar Ramhlun North
Ramhlun North-in an match hnuhnung bera Bethlehem Vengthlang an hneh ṭumin game rang tak an khel a, an khelhna fuh tawk lo awm mah se an nung thar tih erawh a chiang.
Club secretary Lalenghluna (Maenga) chuan, "Kan intum hmasak ai khan kan ṭha leh tawk zawk a, Serchhip-a kan hneh loh chhan kha kan khelh chhiat vang ni loin keeper chetsual vang a ni a. Tunah chuan keeper thar kan lalut a, hnehna chang ngei turin Lammual kan pan ang," tiin Vanglaini a hrilh. Ramhlun North-in BVT first choice keeper Eddie Zorammawia an lalut a, Lunglei tlangval hi tuna an keeper neihsa te aia tawnhriat ngah zawk a nih avangin an ṭhatpui tura ngaih a ni.
MPL ṭan hmain Electric Veng aiin Ramhlun North hi ṭha tura ngaih an ni a, tunah erawh MPL club thar hi ṭha tur zawka dah an ni tawh a, chutihrualin Ramhlun North hian an player ṭhate kha an la kawl reng tih hriat a ṭha a, team ṭha zawk chu zaninah a hriat ang.