Goal khung thiam Liverpool-in hma an hruai

Nilaini zan Champions League inkhelah Liverpool chuan 4-0 in an mikhual Red Star Belgrade an hneh a, Mohamed Salah chuan goal hnih a khung.

Liverpool tan Salah bakah Roberto Firmino leh Sadio Mane te chuan goal khat ve ve an khung a, Anfield-ah minute 90 chhungin mikhual team-in 'hlauhawm' tia sawi tur hun an nei ve meuh lo.

Group C inkhel dangah Paris St-Germain leh Napoli chu 2-2 in an inhneh-tawk a, an elpui pahnihin point an insem avangin Liverpool chu table chung berah an awm phah.

Paris khawpuia inkhelah mualneitu team an vannei a, injury time-a Angel di Maria goal khung hmangin Italian club lakah point an hlawh chhuak hram.

Salah leh 50

Liverpool-in minute 20-na lekah Firmino hmangin goal hmahruai an khung a, minute 45-na leh 51-naah Salah chuan a chhunzawm ve leh bawk - Liverpool tan goal 50 a khung tling ta!

Egyptian forward hian Reds tana goal 50 khung tling turin match 65 bak a mamawh lo a, hetih chhung hian assist vawi 15 a nei tel bawk. Reds tana goal 50 khung tling tura match mamawh tlem ber a ni a, Fernando Torres (72) record a khum.

Liverpool tan Sadio Mane chuan penalty a hlah hnuah minute 80-naah an goal lina a khung a, substitute Adam Lallana chuan goal ngana khung turin referee chiah hmachhawn mah se a hun ṭha neih a chhawr thei lo.

Serbian club tan Srdan Babic chuan set piece aṭanga a hun ṭha neih chu bar chung lama pet nan a hmang a, hun ṭha dang erawh an nei tawh lo - shot vawi li chiah an neih laiin Reds hian vawi 21 an nei thei.

Klopp-a 'team'

Red Star laka starting XI zinga player pariat chu Jurgen Klopp-a player leite an ni a, German coach hian pawisa pek a nihin a 'bazar' chhe ngai lo tih Nilaini zanah pholanin a awm.

Tlarhnungah Alisson leh Virgil van Dijk chu ṭum dang ang bawkin an rinawm a, Andy Robertson a thawhrim ngaiin a thawkrim reng bawk. Jordan Henderson leh Naby Keita inhliam avangin Fabinho leh Xherdan Shaqiri te chu Georginio Wijnaldum nen inkawp tir an ni a, an khel ṭha hle.

A bik taka fak phu chu Shaqiri a ni - Firmino goal khung kha Swiss midfielder ke aṭanga chhuak a ni a, Salah goal hmasa zawk chu ṭha taka a siamsak a ni a, Liverpool starting XI-ah kan hmu nawn fo a nih pawhin a mak lo ang.

Hliam vanga match khat a chawlh hnuah Sadio Mane a dam tawh a, khelmualah a dam zia a pholang - Senegalese forward hi tlarhmaah Firmino leh Salah te nen an in man leh ṭan tawh a, Reds ṭantute tan en a nuam khawp ang.

A la chiang lo

Liverpool boss Jurgen Klopp-a'n hnehna chang mah se an hmaah PSG leh Napoli an awm tih a hria a, engmah a la chian loh thu a sawi. German coach chuan, "Last 16 kan la lut lo. Match tawp ber thlengin he group hi chu a ngaihnawm dawn a ni.

"Kan group harsat zia chu Napoli leh PSG result hian a tichiang em em a ni. Mahse, kan tih theih sang ber chu mahni match-a hnehna chan zel a ni mai," tiin team dang ngaihtuah loa an khelh tur thu a sawi.

Klopp chuan Salah chungchang sawi zawmin, "Salah chungchang sawi fo hi ka kham tawh a, a theihna hi engtiklai mahin ka ringhlel ngai lo a, ani pawh a theihnaah a chiang a ni," a ti.

Khel ṭha em em mai Shaqiri fak zuiin, "Fabinho a khel ṭha a, Shaqiri kha engkimah a inrawlh mai niin ka hre bawk," a ti a, a hlim hle.

PSG an vannei

French club hausa PSG-in an coach hlui Carlo Ancelotti enkawl Napoli an mikhual a, mahni mualah an tlawm dawna a lan hnuin injury time-a Angel di Maria goal khung ropuiin a chhan chhuak.

Italian club-in an phu ang ngeiin minute 29-naah Lorenzo Insigne hmangin hma an hruai a, tlarhmaa Kylian Mbappe, Neymar leh Edinson Cavani neitu PSG-in an si phurh sut ṭhen sak turin Napoli defender Mario Rui own goal an mamawh.

Minute 77-naah Dries Mertens hmangin Napoli-in hma an hruai nawn a, Liverpool an hneh hnuah PSG an ngam ngei dawn niin a lang hman. Mahse, beisei angin thil a thleng lo.

Di Maria-a'n player class sang a nih tih pholangin hun pek belh minute thumnaah an si phurh a sut a, PSG khelmuala Champions League match bul a ṭan hnuhnung parukah goal ruk a khung ta.