Stephens chak niah Osaka a tla?

US Open champion Naomi Osaka chu WTA Finals khelh laiah group stage paltlang zo loin a tla ngei dawn niin a lang ta. Sloane Stephens chuan semifinal-a a beiseina ti nung turin Kiki Bertens a hneh a, inkhel dangah Osaka hi seeded pakhatna Angelique Kerber lakah a tlawm.

Japanese player Osaka hian a match hmasa pahnihah hnehna a chang zo lo a, match hnuhnung berah Bertens sawp pawh ni se, Kerber leh Stephens te inkhela an inhneh dan a zir chauhin a sang pali zinga luh beiseina a nei thei tawh.

Nilaini zan inkhelah kum 25 mi Stephens hian Bertens chu 7-6 (7-4), 2-6, 6-3 in a hneh, American nula hian hnehna chang tur hian game hnuhnung paruk zinga panga a la thei - dinhmun hniam zawka a din hnuah huaisen takin a tho chhuak.

Service vawi 11 ngawt inchhuhsakna inkhelah Kerber chuan Osaka 6-4, 5-7, 6-4 in a hneh. Kum 30 mi Kerber hian harsa lutuk loin set hmasa a la a, set hnihnaah a service a hum loh avangin a hniam zawk. Darkar hnih leh minute 31 an khelh hnuah erawh tawnhriat ngah zawk Kerber a chungnung.

WTA Finals-ah world ranking-a a sang pariat an tel ṭhin a, kuminah hian number 1 Simona Halep chu hliam vangin a inlan thei lo. Player pariat hi group pahnihah ṭhen an ni a, an inkhelh kual hnuah a sang pahnih zelin semifinal an lut dawn a ni.