MFA Executive Committee ṭhukhawm

October 24, 2018 khan Tourist Lodge, Chaltlangah Mizoram Football Association Executive Committee meeting neih a ni. Meeting-ah hian thu pawimawh tak tak rel a ni a, thurel ṭhenkhatte chu:

* Inter District Sub Junior Boys Football Championship chu February 6, 2019-ah Serchhip District Football Association thlen tura rel a ni. He Championship hi January 1, 2004 leh December 31, 2005 inkara piangte inelna tur a ni ang.

* Kum bithiah inelna, Sunfeast Cup 2018 chu November-ah Aizawlah neih leh tura rel a ni a, mawhphurtute inruatin kum bithliah dante leh a hun leh a hmunte, a kalphung kimchangte an rel ang.

* National Sub Junior Boys Football Championship final round khel tura tling tawh Mizoram Sub Junior team chu training chhunzawma final round khel tura inbuatsaih chhunzawm nghal ni se, tih a ni.

* National Junior Boys Championship, November 30, 2018 aṭanga Cuttack, Odisha-a khelh tur atan inbuatsaihna neih ṭan tura rel a ni a, team enkawltu tur pawh ruat an ni. District Football Association tin atangin player ṭhate koh khawm an ni ang a, MPL Under 18 khelh mek aṭangin player en an ni bawk ang.

* All India Football Federation nen ṭangkawpin Referee Development Course chu kumin chhungin Aizawlah neih leh tura ruahman a ni a, a hun tak tur hi AIFF ngaihchan mek a ni.

* AIFF D Licence Course, November 12-17, 2018 chhunga Aizawla neih tura ruahman chu committee chuan lawmawm a ti a; football coaching lama mi tui tak takte he mi kawnga sang tak thlen tuma ṭan la tura pen chhuak turin MFA chuan Mizo ṭhalaite a sawm.

* November, 2018 chhung hian Veteran Football chu MFA in a kalpui dawn a, he mi atana MFA Veteran Committee rawtnate chu a pawm.

* Report hrang hrang ngaihthlak a ni a, tunah hian MFA chuan - Mizoram Premier League, Mizoram Premier League Under 18, Mizoram Under 15 League bakah Reliance Foundation Youth Sports a kalpui mek a ni.

Issued by Information and Publicity Committee, Mizoram Football Association