'King Kohli' - a ropuina a zual zel

India captain Virat Kohli chuan one day international-a run 10,000 siam rang ber record thar a siam a, West Indies lakah India erawh a chakpui zo chuang lo.

Kohli hian ODI-a run 10,000 siam tling tur hian in­nings 205 chiah a mamawh a, a record a khum tak Sachin Tendulkar a khum chiang hle.

Indian legend Sachin hian ODI-a run 10,000 siam rang ber ni turin kum 2001 khan run 10,000 hi a siam tling a, a innings mamawh zat erawh 259 a ni.

Kum 29 mi batsman hian Sachin aiin innings 54-in a mamawh tlem zawk tihna a ni a, a record hi a theuneu lo hle - August 2008 khan Sri Lanka lakah India tan ODI-a a match hmasa ber a khel.

A thlawn mai maw

India hian an mikhual West Indies nen ODI series an khel mek a, Nilaini chawhnu lama an inkhel hi an match hnihna niin match hmasa zawkah Men in Blue an chak.

Visakhapatnam khawpuiah match hnihna an khel a, India an bat hmasa zawk. Rohit Sharma (4 runs) leh Shikhar Dhawan (29) te hma takah out mah se Ambati Rayudu (73) leh Kohli (157) te ropui takin an rawn che a, Kohli hi out loin a tawp thleng a dam!

India-in over 50-ah run 321 an tlin a, wicket ruk chiah an hloh bawk - Virat Kohli ropui niah India an chak ngei dawn niin a lang hman. Mahse, West Indies tan Shai Hope (123 runs) chu a tawp thleng damin a rawn che

ṭha viau a, over 50-ah India run siam zat chiah siamin an nihrual.

Kohli ropuinain India a chhan thei lo a, team pahnih an inhnehtawk. India leh Indies hian an series match thumna chu Inrinni chawhnu dar 1:30-ah an khel leh ang.

Lal thar chu!

Kohli hian West Indies laka run 157 vaw chhuak turin ball 129 hmachhawn chiah a mamawh a, vawi 13 ngawt four vaw chhuakin vawi li chu six run a vaw chhuak bawk.

India captain hian kumin chhung ringawtin ODI run 1000 chuang a siam ta a, kum khata ODI run 1000 siam tling tura hun mamawh tlem ber a ni tel nghal.

Kohli hian ODI pumpuia Sachin Tendulkar run siam zat 18,426 siam tling turin hun erawh a la mamawh deuh dawn a, tun anga a khelh reng erawh chuan ODI-a run siam hnem ber record Sa­chin-a chelh lai hi a umphak leh vat a rin­awm hle.

Khawvel batsman zingah ODI-a run 10,000 siam tling tura innings ma­mawh tlem pathum chu Indian vek an ni - Kohli leh Sachin hnungah hian Sourav Ganguly (263 innings) a awm.

A hming an fak

Kohli-a'n record ropui tak a siam a, Delhi tlangval hi cricket khawvelin an fak rawn. International Cricket Council chuan, "ODI batsman zinga ropui ber?" tiin twitter lamah an tarlang a, BCCI chuan, "King Kohli" an ti thung.

Record a khum sak tak Sachin chuan Kohli hi duh­sakna hlanin, "I theihna leh thawhrimna hi fak tlak a ni. Run 10,000 i siam thei hi ka lawmpui che a, a bak pawh siam zel ang che," a ti.

Virendar Sehwag chuan, "A ropuina hi hlim takin i lawm mai ang u, King Kholi," tiin a fak a, England cricket legend Michael Vaughan chuan, "Ropui ber chu a ni," tiin Kohli aia cricketer ropui a hre lo.

Kum 29 mi chauh a la nih miau avangin Kohli hi a la ropui dawn chauh a, a record siam thu kan la hre nawn fo ang.