ATP Finals khel lo tur Cilic

Marin Cilic-a'n beiseina sang tak nen ATP Finals khelh ngei tum mah se a khel phak dawn ta lo. Swiss Indoors Basel-ah Marius Copil hneh loin second round aṭangin vuak tlak a ni.

Cilic tan ATP Finals khel tur chuan Basel-ah hian champion ngei a ngai, mahse Nilaini zan khan 7-5, 7-6 (7-2) in a chak lo. World number 93 Copil tan Cilic hneh hi chanchin ṭha tak a tling ang.

US Open champion hlui Cilic hian tun hnaiah result ṭha a nei thei lo. US Open quarterfinal aṭanga a tlak hnuah Shanghai Masters leh Japan Open Tennis Championship-ah te a hlawhchham bawk.

Inkhel dangah seeded pa­hnihna Alexander Zverev chuan Robin Haase 6-4, 7-5 in a hneh a, Ger­man player beiseiawm hian tun season chhungin match 50 hnehna a chang tling chiah a, ani aia chak hnem an awm rih lo.

Kar hmasa lawka ATP World Tour title hmasa ber latu Stefanos Tsitsipas chuan Jeremy Chardy 6-2, 7-6 (7-3) in a hneh a, Ernests Gulbis chuan beisei loh taka Jack Sock hnehin Roberto Bautista Agut leh Dusan Lajovic te hnungzuiin round of 16 a lut bawk.

Kevin Anderson erawhin ATP Finals khelh a beiseina a la chhawm nung, South African tlangval hi Vienna Open-ah a inlan a, a khingpui tur Jurgen Melzer a inhnuhdawh avangin inkhelh hah ngai loin a tlang.