Saina leh Srikanth an chak

Indian badminton shuttler chhuan­vawr pahnih Saina Nehwal leh Kidambi Srikanth te chuan Nilaini zan khan French Open-ah an match hmasa ber an khel a, harsa lutuk loin hnehna an chang - Sameer Verma erawh Badminton World Federation hnuaia inelna lianah hian a chak lo thung.

Kar hmasa lawka Denmark Open final kheltu Saina a hmuh­nawm chhunzawm a, London Olympics bronze medalist hian Japan nula Saena Kawakami chu 21-11, 21-11 in a hneh.

Mipa singles lamah champion lai Srikanth chuan Hong Kong shuttler Wong Wing Ki Vincent chu 21-19, 21-13 in a hneh a, Srikanth tan World Tour Super 750 event-ah harsatna a awm rih lo.

World number 10 Saina hian a match lehpekah chuan 2017 world champion Nozomi Okuhara leh Beatriz Corrales te inkhela a chak zawk a hmachhawn leh ang. Mipa seeded pangana Srikanth chuan Korean tlangval Lee Dong Keun a hmachhawn thung ang.

Inkhel dangah 2017 Singapore Open Champion B. Sai Praneeth chuan Brazilian shuttler Ygor Coelho chu 21-13, 21-17 in a hneh a, a hma a ding leh tur chu Asian Games gold medallist Jonatan Christie a ni.

Denmark Open quarterfinalist Sameer erawhin Indian shuttler dang hnung a zui thei lo. Christie nen darkar hnih chuang ngawt an inkhelh hnuah 21-16, 17-21, 15-21 in a chak lo zawkah a ṭang.

Men’s doubles pair Manu Attri leh B. Sumeeth Reddy ten Korean duo Min Hyuk Kang leh Kim Won Ho lakah 21-18, 21-17 in hnehna an chang a, women’s doubles pair Meghana Jakkampudi leh Poorvisha S. Ram te ṭangdun pawhin second round lut turin Lise Jaques leh Flore Vandenhoucke te chu 21-12, 21-12 in an hneh ve bawk a ni.