Pathianni tlaiah Lajong Vs Aizawl FC

Aizawl FC chuan nimin khan I League khel turin Shillong an pan a, Pathianni tlai dar 5:00-ah Shillong Lajong nen an inhmachhawn ang.

MPL club hian player 18 an hruai zingah foreigner panga Alfred Kemah Jaryan, Ansumana Kromah, Kareem Omolaja, Léonce Dodoz Zikahi leh Bektur Talgat Uulu bakah state pawn player keeper Gurpreet Singh te an tel a, a bak zawng hi Mizo player-te an ni.

Season liam ta khan Aizawl FC-in Portuguese coach Paulo Meneses hnuaiah bul ṭanin result ṭha an neih loh avangin season tawp lamah Santosh Kashyap an lalut a, pangana niin season an khar. Mizo club hian result ṭha an neih loh chhan hi I League bakah AFC Champions League Playoff leh AFC Cup an khel a, an squad chhah loh an tuar.

Kuminah erawh MPL khelh ngai mah se I League nena khel kawp turin an squad a ṭha tawk a, beisei an nei sang hle. AFC coach Gift Raikhan chuan, "I League kan ngai pawimawh a, chuvangin BVT nen player chhawr ṭhin te ka awltir a, inhliam nei chunga season bul ṭan kan duh lo," tiin Vanglaini a hrilh.

Mizo club hmachhawn tur Shillong Lajong hian foreign player an lalut lo a, Mizo tlangval Samuel Lalmuanpuia chu an player rinrawl tur a ni.

Hemi chungchang hi sawiin Gift chuan, "Foreigner an neih loh vangin zuam ngawt chi a ni lo a, an muala khel tur kan ni tih kan hriat a ṭha. Rawlthar rual hmachhawn hi a harsa a, an chet ran avangin chetsual theihna a ni a, chutihrualin point thum kan hlawhchhuah ngei a ngai a ni," tiin team ṭha zawk an nih thu a sawi.

Lajong hmachhawn tur AFC
Goalkeepers: Arema, Gurpreet
Defenders: Rinchhana, Achia, Kareem, Zohera, Valpuia, Duata
Midfielders: David, Bektur, Alfred, Paul,
Forward: Dodoz, Isak,
Rinfela, Albert, Kromah, Remsanga