Aizawl FC squad a chhah Ṭha

Aizawl FC-in Ningani zan khan Mc Dowell's No. 1 Soda Mizoram Premier League Season 7-ah Bethlehem Veng-thlang FC chu 1-0 in an hneh a, point 16 hmuin semifinal kawng an zawh zel.

AFC coach Gift Raikhan-a'n a thusawi ang ngeiin player inlan tlem zawk a luhtir a, chutichung chuan an player chhawr te an la hraw a, I League leh MPL khel kawp turin an squad an ṭha tawk.

AFC tana inlan chu...

Aizawl FC-in goalkeeper Lalawmpuia an luhtir a, ani hi MPL hmasa palia best goalkeeper ni vek thei a ni a, Mizo keeper ṭha ber zinga mi a ni.

Tlarhnungah Lalhriatrenga leh SR Lallawmawma te inkawpin a sirah Joe Zoherliana leh V. Lalchhunawma te an awm. Chhuantea hi ONGC captain

ni tawh leh 2016 Santosh Trophy-a Mizoram player pawimawh a ni a, Zohera hi Shillong Lajong aṭanga inzir chhuak niin Chanmari FC leh Pune City-ah te awm tawhin Achia hi tualchhung defender tawnhriat nei ṭha ber zinga mi a ni a. Lawma erawh theihna nei sang, inzir belh tur la nei a ni thung.

Midfield laiah tualchhung footballer lar ber zinga mi David Lalrinmuana a awm a, rawlthar duhawm Hmangaih-kima a kawppui a; mual sirah Rochharzela leh Jessy Laldinpuia Ralte te an awm a, MPL-a hman tlak vek an ni.

Forward-ah Lalkhawpui-mawia leh Lalruatfela Zote te an awm a, Kelkang tlangval Mapuia'n hming a chher chho zel a, MPL5 best midfielder Fela Zote erawh inhliam vanga season liam ta a reh hmak hnuah a intuai thar leh ṭan.

Danglamna goal mawi

Aizawl FC-in bul an ṭan ṭha a, khelmual rap ngai lo an inlan tam tih a hriat loh. Inkhel an thunun a, first half-ah ball chang tam zawk an ni a, goal chance pawh an insiam hnem zawk. Minute 27-naah K. Lalhmangaihkima'n yard 30 vel aṭangin David aṭanga a ball hmuh chu kawh pawtin goal kilah tak a pet lut a, BVT keeper thar R. Lalhmangaihzuala tan daih ngaihna a awm lo.

AFC player-te'n match fitness an nei lo tih a lang zui a, second half-ah BVT an chungnung tawh zawk.

Table mawngphaha awm Bethlehem Vengthlang tan Lalchhuanpuia'n goal ban a tauh per a, AFC coach Gift-a'n point thum hlawh chhuah ngei tumin foreigner Alfred Kemah Jaryan leh Bektur Talagat Uulu bakah Albert Zohmingmawia te luhtirin an goal neih an hum hram.

Hmabak a hautak

Aizawl FC-in MPL leh I League an khelh kawp dawn avangin player an siksawi chhoh zel a ṭul dawn. Coach Gift Raikhan chuan, "Player zawng zawng kan rin ngam hi a ṭul a, anni pawhin kan rinna anga an khelh chhuah a ngai a ni," tiin a sawi.

Gift-a hian I League ṭan hmain player ṭhenkhat training-naa chet ṭhat tawk loh vang leh discipline chhiat vangin chhawr loh a nei a, tuna inelna pahnih an khelh kawp a ṭul takah chuan loh theih loin a hmang a, tawnhriat nei ṭha leh theihna sang an awm fur avangin season tawp lama an theihna anga an khelh chuan an ṭhatpui a rinawm.

Gift chuan, "I league leh MPL kan khel kawp dawn a, I League-a khelh beisei vak lo player pawh an phur thar a, training-naah pawh an ṭang hle. Player ṭha vek an ni a, I League leh MPL player an awm hrang lo, mamawh angin kan chhawr ang," a ti.