Hei le Vernon Young chu

Mizoram Super League vawi hnih champion tawh Khatla TBL chuan Ningani zan khan MSL 5-a an match hmasa ber khelin Tuikual South chu 102-83 in an hneh nghal, TBL tan hian Vernon Young chuan point 48 zet a score bakah rebound vawi 10 a la bawk - inkhel entute mit ti tlaitu Young hi Player of the Night atan thlan nghal a ni.

Hawla Indoor Stadium, Republic Vengthlanga inkhelah team pahnih an in hlau lo a, TBL lamin tawnhriat nei ṭha H. Laldinsanga an nei a, India tana inlan tawh Mapuia hian tualchhung player ṭha Eddie Zaithanmawia (22 points) leh Moses Zoremmawia (10) te vul theih nan tha a thawhhlawk.

TBL player Young-a chu inkhel boruak thlak hlawh khawpa thawhhlawk a ni a, quarter khatnaah Tuikual nen inkhel tawk viau mah se, quarter hnihnaah chauh point 22 ngawt neiin dinhmun ṭhaah a hlangkai. Mission Veng Vikings player hlui Ronald March (49 points) tih lohah chuan MSL match khata point score hnem ber a ni.

Tuikual lamin season dang ang bawkin F. Zodin-thara an chhawr ṭangkai leh dawn, Dina hian hnehna chanpui zo lo mah se point 26 ngawt a nei thei a, inter state player Shashank J Rai (20 points) ai pawhin a thawhhlawk zawk. TBL lakah chak lo mah se Tuikual hian team ṭha TBL lakah point 80 chuang an neih theih avangin MSL5 team ṭha zinga an tel phak a beiseiawm.

Phengphehlep hian an match hnihna atan November 1-ah team thar BC Bethlehem an hmachhawn leh dawn a, match hmasa zawka chak lo ve ve an ni.

Khatla TBL erawhin October 30, Thawhlehni zan hian Zarkawt Serpents an bitum ve thung ang.