Vawiinah Kolkata club lian inlan dawn

Nizanah I League khelh ṭan a ni a, vawiinah match hnih khelh tur niin Kolkata club lian pahnih East Bengal leh Mohun Bagan te an inlan dawn.

East Bengal hian vawiin chawhnu dar 2:00-ah Neroca chu an mualah an lenchilh dawn a, Mohun Bagan hian vawiin tlai dar 5:00-ah Gokulam Kerala an lenchilh thung ang.

I League champion lai Minerva Punjab chu Pathianni chawhnu dar 2:00 hian an inlan ve dawn bawk a, Churchill Brothers chuan an lenchilh dawn a ni.

Neroca chu

Manipur club Neroca hi Aizawl FC coach hlui Manuel Retamero enkawlna hnuaia khel tur an ni a, pre-season an hman ṭhat avangin an phur vanglai tak a ni.

Neroca hian season hmasaa an chet ṭhatpui sa Felix Chidi Odili, Burnley midfielder hlui Aryn Williams leh Liberia tana inlan tawh Varney Kallon te an chelh thei a, an vannei hle.

Anni bakah hian Mohun Bagan leh East Bengal tana khel tawh Eduardo Ferreira leh Katsumi Yusa bakah Italian keeper Mauro Boerchio te an lak belh a, East Bengal hmachhawn turin an inpeih viau ang.

East Bengal 'thar'

Kolkata club-in Quess vangin sum hman tur an ngah thar a, an buai lo. An 'fapa chuam' tia chhal ngam Lalrindika Ralte an kawl leh tawh a, Laldanmawia, Lalramchullova leh Brandon VL Remdika an kawl bawk.

World Cup 2018-a Costa Rica tana inlan, defender Johnny Acosta an lakluh theih avangin Neroca tlarhma tan tawn tlang an harsa dawn tih a chiang a, a dinpui turin La Liga lama Granda tana season hnih khel tawh Borja Gómez Pérez a la awm cheu.

Kolkata club hian coach thar atan Alejandro Menendez an lalut bawk a, ani hi Real Madrid youth team pawh lo enkawl tawh a ni a, Neroca laka tlawm nghal a duh lo ang.

Hei le Bagan

Mohun Bagan-in season hmasaa an coach Sankarlal Chakraborty ho bawkin an khel leh dawn a, Lalchhawnkima leh William Lalnunfela chu Mizo player an kawl a ni.

Bagan hian Sony Norde, Aser Pierrick Dipanda leh Henry Kisekka te an kawl a, Aizawl FC midfielder hlui Yuta Kinowaki an kawl bawk.

Gokulam hian Queen Park Rangers forward hlui Antonio German an lakluh chu an chhuan ver ber a ni a, NorthEast United tana khel tawh, Brazilian midfielder Guilherme Batata an neih bawk avangin awlsam taka hneh tur an ni bik lo.