Chak ngei ka tum - Hamilton

Lewis Hamilton tan Formula 1 champion ni turin kawng thui zawh a ngai tawh lo, Pathianni zan dar 12:40 hian Mexican Grand Prix an tlan dawn a; Mercedes driver hi pasarihna chinah a thleng a nih chuan a vawi nga nan a champion tawh dawn.

Britain tlangval hian hma a hruai fal tawh a, a elpui ber Sebastian Vettel nen an inthlauhna chu point 70 zet a ni tawh - tun season chhungin intlan­siak hmabak pathum a la awm a, pakhatna ni vek tan pawha point hmuh theih zat chu 75 a ni.

Season hmasa pawh khan Hamilton hian Me­xico-ah tho hian world champion nihna a chelh tawh a, chumi ṭum chuan pakuana a ni. Kuminah erawh hnehna chang chung ngeia champion a tum.

Kum 33 mi Hamilton chuan, "World champion nih hi F1 car ka khalh tirh aṭanga ka thil tum ber kha a ni a, hlawhtlinna hun ṭha ka nei thei a nih phawt chuan bawhpelh ka tum lo. Tun ang dinhmunah hi chuan rilru hi a chiai ve deuh thei a, chutihrualin fimkhur leh rilru fim taka awm a ngai.

"Ka dinhmun hi ṭha viau tawh angin lang mah se ka kuta nomawi a awm chian hma chuan inthlahdah theih a ni lo, Mexico-ah hian hun duhawm ka lo hmang tawh ṭhin a, kuminah hian hnehna chang chung ngeiin hun hman ka tum," tiin a sawi.