Quarterfinal-ah a ṭha pathum
India badminton khel thiam pathum Kidambi Srikanth, Saina Nehwal leh PV Sindhu te chuan French Open BWF World Tour Super 750 khelh mekah quarterfinal an in vaw kai vek.
Mipa singles champion lai Srikanth chuan player ṭha bik a nihzia lantir nan world number 25 Lee Dong Keun chu 12-21, 21-16, 21-18 in a hneh a, second round paltlang tur hian darkar khat leh minute 13 ngawt a mamawh. Indian shuttler hian an intawn hnuhnung pahnihah Korean tlangval hi a ngam lo a ni.
Kar hmasaa khelh zawh tak Denmark Open finalist Saina pawh a chak chhunzawm zel, Saina hian world champion hlui Nozomi Okuhara chu 10-21 21-14 21-17 in a hneh, kar hmasa tho khan Saina hian Japanese shuttler hi a lo ngam tawh bawk.
Srikanth leh Saina te hian fiahna hautak an hmachhawn thei dawn, champion lai Srikanth hian world champion Kento Momota a hmachhawn dawn, Japanese player nen an intawn tawhnaah 9-3 in a hnufual zawk. Saina pawhin semifinal lut tur chuan world number 1 Tai Tzu Ying a paltlang a ngai ve bawk.
Tun hnaia result duhthusam nei thei lo Sindhu-i'n Sayaka Sato chu 21-17, 21-16 a hnehin a thiam pariat zingah a inhlangkai ve bawk a, Rio Olympic silver medalist hian ṭha taka season khar thei tur chuan French Open champion nomawi chawi a mamawh hle a ni.