Chelsea chakna Ruben Loftus-Cheek Arsenal tan Welbeck goal khat a tawk
Ruben Loftus-Cheek-a'n Chelsea tan hattrick siamin an mikhual Belarusian champion Bate Borisov chu 3-1 in an sawp. Premier League club dang Arsenal pawhin Danny Welbeck goal khat hmangin khualmualah Sporting Lisbon 1-0 in an hneh ve bawk.
Blues leh Gunners hian match thum an khelh tawh chinah hnehna an chang vek a, English club pahnih hi Group L leh Group E hmahruaitu an ni; last 16 la lut chiah lo mah se knock out stage lut turin an dinhmun a ṭha tawh hle.
Hei le Loftus-Cheek
Stamford Bridge-ah a tir aṭanga a tawp thlengin Chelsea lamin inkhel an thunun tluan chhuak, minute khat leh second 42 lekah Loftus-Cheek chuan Davide Zappacosta-a cross a khung nghal.
Kum 22 mi hian Willian-a corner pet aṭanga ball kal chu ṭha takin a volley lut bawk, English midfielder hian Blues tana a hattrick hmasa ber siam turin yard 20-a hla aṭangin a khung leh bawk; Bate tan hun tawp lama Aleksei Rios goal khungin awmzia a nei phak lo.
Maurizio Sarri-a'n league lamah Loftus-Cheek hi a chhawr rim lo a, khelmual chhungah minute 33 bak hun a la hmang lo. Italian manager hian a player duh zawng N'Golo Kante leh Jorginho te erawhin minute zawng zawng an khel kim vek thung.
Chelsea striker hlui Didier Drogba khan 2006 khan European football-ah hattrick a siam a, Ivory Coast captain hlui hnuah Loftus-Cheek hi a sulhnu rawn zui ve leh thei awmchhun a la ni rih. Season hmasa Crystal Palace lama loan hmanga an kaltir hian hmun nghet chang tur erawh chuan a nghah rih deuh a la ngai mai thei.
Match 13 chu...
Season ṭan hma khan Sarri-a'n an theihna ang taka khel chhuak tur chuan thla hnih emaw, thla thum tal an mamawh tur thu a sawi. Mahse, Italian manager hian match 13 a kaihhruai tawh chinah Blues-in chak loh an la nei lo!
Europa League an match hmasa pahnihah an chak hram a, Bate Borisov lakah erawh an chungnung hle. Playmaker Eden Hazard awm loh zanah Loftus-Cheek a hmuhnawm a, Zappacosta leh Olivier Giroud te goal khung ngei tura ngaih Bate goalkeeper Denis Scherbitski-a'n a dan sak bakah hun ṭha dang an insiamsak hnem hle bawk.
Chelsea boss Maurizio Sarri chuan, "Kan thil tum chu a rang thei ang bera knock out stage luh leh group hmahruaitu nih a ni. Minute 65 chhung kan khel ṭha em em a, a hnu lam minute 20 vel erawh a ṭha tawk lo, chutihrualin ka nauten an khel ṭha hle. Hmasawnna tur la a la awm, hnehna chan rual chiah hian goal chhuah loa chak ka duh," a ti.
Blues hian Pathianni zanah league match khel turin Burnley an lenchilh dawn a, a hnuah Crystal Palace an mikhual ang. November 8-a Bate Borisov nen an inkhelh leh hmain Frank Lampard-a enkawl Derby County nen Carabao Cup khelh tur an nei bawk.
Arsenal chak zel
Unai Emery hnuaia harhtharna chang Arsenal-in inkhel thunun mah se an fehchhuahna ramah goal khung an harsat a, Sporting Lisbon keeper Renan Ribeiro-a'n Henrikh Mkhitaryan leh Pierre-Emerick Aubameyang te goal khung tur chu ṭha takin a dan sak.
England international striker Welbeck-a'n a tauh luh hmasak chu a zuanna lamah a foul avangin pawm a ni lo a, minute 77-naah erawh sawisel tur awm loin goal awmchhun a khung; hun tawp thlengin Manchester United winger hlui Nani awmna Portuguese club lamin a chhan letna an nei lo.
Arsenal hian tun hnaia inelna an hmachhawn hrang hrangah a zawnin match 11 chhung hnehna an chang tawh, an match hnuhnung bera Leicester City hnehtu zinga player paruk ngawt siksawi an ni chungin dinhmun hlauhthawnawmah an awm lo. An zina chhuah hnuhnung vawi thuma an chak lohna ram Portugal-ah hnehna an chang.
Gunners manager Unai Emery chuan, "Tunah chuan Pathianni zana Crystal Palace nena kan inkhelh leh tur chiah kan ngaihtuah ang, min ṭantute nen hun nuam tak kan hmang mek zel a ni. Fans an lungawi chuan kan tan hna thawh a nuamin a phurawm em em mai ṭhin a ni. Hnehna chan zel kan duh a, chutih rualin chak lo thei pawh kan ni ve tho, kan chak tawk lohna lai siamṭhat zel theih kan tum tur a ni," a ti.
Insiksawi
Emery naute hian Pathianni zan dar 7:00-ah Crystal Palace an lenchilh dawn a, Nilaini zanah Blackpool nen an intawn dawn bakah November 3 hian Emirates Stadium-ah league nomawi an inchuhpui Liverpool an mikhual dawn bawk.
Spanish manager tan player siksawi thiam a ngai chho hle a, dam chiang lo chunga chhawr luih chi pawh an ni rih lo. Nacho Monreal leh Sead Kolasinac ten hliam tenau an neih avangin Granit Xhaka chu left back-ah dah a ni; Swiss international hi Foxes nen an inkhelh ṭumin tlarhnungah hian pawh thlak a lo ni tawh bawk.
Mesut Ozil chu zin ve mah se bench-ah hahchawlhtir a ni a, season tawpa contract hmang zo tur Aaron Ramsey leh Mohamed Elneny te an lut thung. Sawi hmaih theih loh chu Matteo Guendouzi a ni, kum 19 mi chauh la ni mah se khelmual chhungah a thawkrimin a rintlak a, Gunners fans lamin an thlamuanpui der tawh.
Striker Alex Lacazette, Mesut Ozil leh Pierre-Emerick Aubameyang te angin Danny Welbeck hi an sawi vul lo a ni mai thei, Gunners tan inkhel bul a ṭan hnuhnung pangaah goal li a khung bakah aṭhiante khung tur vawi khat a siamsak bawk - a rintlak viau tih a nemnghet.
Europe - UEFA Europa League
October 25, Ningani zan Results
Zurich 3 - 2 Bayer Leverkusen
AEK Larnaca 1 - 1 Ludogorets
Salzburg 3 - 0 Rosenborg
RB Leipzig 2 - 0 Celtic
Zenit 2 - 1 Bordeaux
Copenhagen 0 - 1 Slavia Praha
Anderlecht 2 - 2 Fenerbahçe
Spartak Trnava 1 - 2 Dinamo Zagreb
Qarabag 0 - 1 Vorskla
Sporting CP 0 - 1 Arsenal
Milan 1 - 2 Real Betis
F91 Dudelange 0 - 2 Olympiakos
Rangers 0 - 0 Spartak Moscow
Villarreal 5 - 0 Rapid Wien
Standard Liege 2 - 1 Krasnodar
Sevilla 6 - 0 Akhisarspor
Eintracht Frankfurt 2 - 0 Apollon
Marseille 1 - 3 Lazio
Jablonec 1 - 1 Astana
Rennes 1 - 2 Dynamo Kiev
Sarpsborg 08 1 - 1 Malmo FF
Besiktas 2 - 4 Genk
Chelsea 3 - 1 BATE
PAOK 0 - 2 Vidi